«Байыас байыаска, убайтан быраакка» аахсыйа салҕанар

Саха сирин үтүө санаалаах дьонун сэргэ байыаннай дьайыы кыттыылаахтара эмиэ бэйэ-бэйэлэригэр көмөлөһөллөр. Муома улууһуттан «Холод» диэн позывнойдаах буойун Иван М. «Саха волонтердара» хамсааһыҥҥа сыаналаах электрическэй кэлээскэни бэлэхтээтэ.

Иван оҥорбут үтүө быһыыта ураты суолталаах. Маннык бэлэҕи аан бастаан 2024 сыллаахха байыаннай дьайыыга эчэйбит буойун Петр Е. оҥорбута. Оччолорго Петр бэйэтин өлөр өлүүттэн быыһаабыт, илиитэ-атаҕа тоҥмут буойуну сэрии толоонуттан соһон таһаарбыт биир дойдулааҕар электрокэлээскэни бэлэхтээбитэ.

Биһиги уолаттарбыт маннык истиҥ, аһыныгас, атын киһи кыһалҕатын чугастык ылынар дьон!

Кэлээскэ Вороновоттан Саха сирин Бэрэстэбиитэлистибэтигэр волонтердар Александр Макаров уонна Валерий Подолин көмөлөрүнэн аҕалылынна диэн «Саха волонтердара» иһитиннэрэллэр.