Байыас кэргэнэ массыына ыытарга үөрэнэригэр көмө бэриллэр

Саха сиригэр 2025 сыл тохсунньу 1 күнүттэн саҥа көмө миэрэтэ олоххо киирдэ. Анал байыаннай дьайыыга өлбүт, эбэтэр, инбэлиит буолбут буойун кэргэнэ массыына ыытарга үөрэнэригэр харчынан көмө оҥоһуллар.

— Массыына ыытарга үөрэниини толуйар харчынан көмө муҥутуур суумата 53 тыһыынча солкуобайтан үрдүө суохтаах. 2022 сыл олунньу 22 күнүттэн суоппардары бэлэмниир кууруска үөрэнэргэ дуогабар баттаспыт дьоҥҥо бэриллэр, — диэн бырабыыталыстыба бэрэссэдээтэлин солбуйааччы Георгий Степанов брифиҥҥэ кэпсээтэ.

Сайабылыанньаны «Госуслуги» портал нөҥүө, эбэтэр, «Мои документы» киин нөҥүө биэриэххэ сөп.

Маны тэҥэ, байыастар дьиэ кэргэттэригэр көмөнү оҥоруу үлэтэ салҕанар. 177 дьиэ кэргэн гааска холбонорго көмөнү ыллылар. 591 төрөппүт сонотуоруйга-куруорка эмтэнэр кыахтанна. 426 байыас эмтэнэ барарыгар материальнай көмөнү ылла.

1074 байыас уонна кинилэр дьиэ кэргэттэриттэн 1878 киһи доруобуйа харыстабылын, социальнай хааччыйыы тэрилтэлэригэр реабилитацияны аастылар. 973 киһи Дьарыктаах буолуу киинигэр тиийэн, 155 киһи эбии үөрэннэ, 412 киһи үлэ булла.

Ил Дархан, бырабыыталыстыба пресс-сулууспата.