Байыас Василий Данилов кэриэһигэр аналлаах флешмоб ыытылынна

Ыам ыйын 9 күнүн – өрөгөйдөөх Улуу Кыайыы 78 сылын өрө күүрүүлээхтик бэлиэтээтибит. Бэҕэһээ, Дьокуускай куоракка, өрөспүүбүлүкэ Уопсастыбаннай балаататын өйөбүлүнэн, кэнники сылларга үгэс буолбут, «Бессмертный полк» аахсыйа  буолан ааста.

Аахсыйа чэрчитинэн анал байыаннай эпэрээссийэҕэ дьоруойдуу охтубут саха хамандыыра, разведчик Василий Данилов кэриэһигэр аналлаах флешмоб ыытылынна. Дьокуускай куорат олохтоохторо Василий Данилов мэтириэттээх футболкалары, аахсыйа атрибутикатын кыһыл таҥаһы кэтэн хаамыстылар,  хаартыскаҕа түһэн социальнай ситимнэргэ тарҕаттылар. Тимир көлөлөөхтөр Василий мэтириэтин массыыналарыгар киэн тутта сыһыардылар.

Санатан эттэххэ, кулун тутар ыйга Василий Даниловка «Арассыыйа дьоруойа» ааты иҥэриини өйөөн 49 тыһыынча илии баттааһына хомуллан турар.