Байыастар 185 ыалыгар олорор дьиэлэрин гаастааһыҥҥа матырыйаалынай көмө оҥоһулунна

Саха сиригэр байыаннай дьайыы кыттыылаахтарын 185 ыалыгар олорор дьиэни гаастааһыҥҥа матырыйаалынай көмө оҥоһулунна. Бу туһунан от ыйын 28 күнүнээҕи брифиҥҥэ Саха сирин вице-премьерэ Георгий Степанов иһитиннэрдэ.

Байыаннай сулууспалаахтар 718 төрөппүттэрэ санаторнай-курортнай эмтэниини барар кыахтаннылар. 541 киһиэхэ байыаннай сулууспалаах эмтэнэр сиригэр айанныырыгар матырыйаалынай көмө бэрилиннэ. Доруобуйа харыстабылын уонна социальнай хааччыйыы тэрилтэлэригэр байыаннай дьайыы 1329 кыттыылааҕа уонна кинилэр дьиэ кэргэттэрин 2509 чилиэнэ доруобуйаларын чөлүгэр түһэрэр эмтэниини ааста.

449 киһиэхэ дьиэҕэ уонна полустационарнай көрүҥүнэн социальнай өҥө оҥоһулунна. Өйөбүл миэрэлэрин биир сүрүн хайысхатынан сулууспаттан уурайбыт байыаннайдары уонна кинилэр дьиэ кэргэттэрин үлэнэн хааччыйыы буолар. Георгий Степанов тылларынан, нэһилиэнньэ дьарыктаах буолуутун кииннэригэр үлэҕэ киирэргэ көмө көрдөөн 911 киһи туруоруста, ол иһигэр – 328 байыаннай дьайыы кыттыылааҕа уонна 583 байыаннай сулууспалаах дьиэ кэргэнин чилиэнэ. Кинилэртэн 165 киһи идэтийбит үөрэххэ ыытылынна, 557 киһи үлэнэн хааччылынна.