Байыастар 700-кэ кэргэттэрэ комплекснай чөлүгэр түһэриини аастылар

Доруобуйаларынан хааччахтаах оҕолорго уонна эдэр ыччакка аналлаах өрөспүүбүлүкэтээҕи чөлүгэр түһэрэр кииҥҥэ байыаннай дьайыы кыттыылаахтарын 697 кэргэттэрэ, ол иһигэр 402 оҕо уонна 295 улахан киһи, комплекснай чөлүгэр түһэриини аастылар. Бу туһунан тохсунньу 22 күнүгэр буолбут брифиҥҥэ тэрилтэ дириэктэрин эбээһинэһин быстах кэмҥэ толорооччу Анна Пудова иһитиннэрдэ.

«Саха Өрөспүүбүлүкэтин Ил Дарханын Айсен Николаев Ыйааҕын толоруу чэрчитинэн, Өрөспүүбүлүкэтээҕи чөлүгэр түһэрэр кииҥҥэ  байыаннай дьыйыыкыттыылаахтарын кэргэттэрин комплекснай чөлүгэр түһэрии салҕанар. Оҕолорго психолог уонна дефектолог өҥөлөрө оҥоһуллар, массаж, физио-эмтэнии, гидрованна процедуралара, эмтиир физкултууранан уонна бассейҥҥа дьарыктар ыытыллаллар. Улахан дьоҥҥо психотерапевт тус консультацията, психологическай трениннэр, ону тэҥэ «Эрэли бэлэхтээ» бырайыак чэрчитинэн араас маастар-кылаастар көрүллэллэр», — диэн Анна Пудова бэлиэтээтэ.

Кини иһитиннэрбитинэн, кииҥҥэ сүрүн чөлүгэр түһэрэр процедуралартан ураты, саастарынан ГТО нуорматын туттарыыга бэлэмниир өҥөлөр киллэрилиннилэр. Чөлүгэр түһэриини барааччыларга араас социальнай-култуурунай тэрээһиннэр ыытыллаллар. Ону таһынан, үөрэх бырасыаһын быстыбатын хааччыйар сыалтан, сыл саҕаланыытыгар тэрилтэ оҕолору үөрэхтээһини тэрийиигэ СӨ Саҥа технологияларын институтун кытта бииргэ үлэлээһин туһунан Сөбүлэҥҥэ илии баттаабыта.

СӨ Ил Дархана Айсен Николаев ааспыт сыл ахсынньытыгар Ил Түмэҥҥэ туһаайан этиитигэр, байыаннай дьыйыы кыттыылаахтарын байыаннай сулууспаҕа,  төлөбүрдэри уонна өйөбүл миэрэлэрин ылыыга сыһыаннаах  кыһалҕаларын быһаарыы бары структуралартан сөптөөх үлэни эрэйэрин  бэлиэтээбитэ. Бу үлэ Аҕа дойдуну көмүскээччилэр судаарыстыбаннай пуондатын Дьокуускайдааҕы салаатын кытта бииргэ ыытыллар.

«Сулууспаттан босхоломмут буойуттарга бастакы уочарат мэдиссиинэ көмөтө оҥоһуллар: чинчийии, эмтэнии, комплекснай чөлүгэр түһэрии. Уустук, анал көмөнү оҥорууга «тирэх» килииньикэлэр быһаарылыннылар. Бойобуой дьайыылар бэтэрээннэрин, ордук өлбүт уонна сураҕа суох сүппүт байыастар кэргэттэрин, оҕолорун психологическай өттүнэн арыаллааһыны күүһүрдэр наада. Буойуттары эйэлээх олоххо төнүннэрэн социальнай өттүнэн чөлүгэр түһэрии уонна үөрэтии боппуруостара ураты болҕомтону эрэйэллэр. Бу – үөрэххэ уонна үлэҕэ туруоруу, уопсастыбаннай олоххо кытыннарыы буолар», – диэн Айсен Николаев бэлиэтээтэ.