Байыастар 723 төрөппүтэ санаторнай-курортнай эмтэниинэн туһанна

Бүгүҥҥү туругунан Саха сиригэр байыаннай дьайыы кыттыылаахтарын 723 төрөппүтэ, уопсайа 41 мөлүйүөнтэн тахса солкуобай суумаҕа, санаторнай-курортнай эмтэниинэн туһанна. Бу туһунан брифиҥҥэ өрөспүүбүлүкэ Үлэҕэ уонна социальнай сайдыыга миниистирэ Елена Волкова иһитиннэрдэ.

«Байыаннай дьайыы кыттыылаахтарын уонна кинилэр дьиэ кэргэттэрин өйүүр инниттэн хас да социальнай өйөбүл миэрэтэ көрүллэр. Ол иһигэр өрөспүүбүлүкэҕэ олорор байыаннай сулууспалаахтар төрөппүттэригэр Арассыыйа Федерациятын сиригэр-уотугар санаторнай-курортнай эмтэниигэ көмө оҥоһуллар», – диэн Елена Волкова эттэ.

Кини иһитиннэрбитинэн, байыаннай сулууспалаахтар төрөппүттэригэр санаторнай-курортнай эмтэниигэ өйөбүл путёвка сыанатын кээмэйинэн харчынан төлөбүр быһыытынан оҥоһуллар, ол эрээри 14 халандаарнай күҥҥэ 60 тыһыынча солкуобайтан элбэҕэ суох буолуохтаах. Бу үп-харчы дьиҥнээхтик оҥоһуллубут ороскуоттарынан бэриллэр, эбэтэр өрөспүүбүлүкэ иһигэр санаторнай эмтэниигэ путёвка сыанатын 80% кээмэйинэн сорох чааһын төлөөһүн быһыытынан оҥоһуллуон сөп.

Санаторнай-курортнай путёвканы атыыласпыкка дьиҥнээх ороскуоту толуйар харчы төлөбүрүн ылар туһугар, байыаннай сулууспалаах төрөппүтэ сайабылыанньатын уонна бигэргэтэр докумуоннарын илдьэ өрөспүүбүлүкэтээҕи «Мин докумуоннарым» кииҥҥэ тиийиэхтээх, эбэтэр e-yakutia.ru портаалга сайабылыанньаны толоруохтаах.