Байыастар чөлгө түһэллэригэр үлэ ыытыллар

Ю.П. Степанов аатынан Өрөспүүбүлүкэтээҕи инбэлииттэри реабилитациялыыр  социальнай-чэбдигирдэр кэлим кииҥҥэ анал байыаннай дьайыы 415 кыттыылааҕа уонна кинилэр дьиэ кэргэттэрин 391 чилиэнэ реабилитацияны аастылар. Бу туһунан киин дириэктэрэ Асида Алексеева брифиҥҥэ кэпсээтэ.

— Биһиги бу үлэни Ил Дархан сорудаҕынан ыытабыт. Биһиги кииммитигэр байыастарга уонна дьиэ кэргэттэрин чилиэннэригэр анаан доруобуйаларын чөлүгэр түһэриигэ, уйулҕалара, майгылара уоскуйарыгар көмө оҥоһуллар. Улахан болҕомто социальнай-психологическай уонна социальнай-мэдиссиинискэй боппуруостарга ууруллар, — диэн кини кэпсээтэ.

Киин «Самородок» бассейны кытта үлэлэһэр. Онно байыастарга гидрокинезотерапия дьарыга ыытыллар. Маны тэҥэ, Арчы дьиэтигэр алгыс сиэрэ-туома ыытыллар.

Маны тэҥэ, кииҥҥэ байыастарга, кинилэр дьиэ кэргэттэригэр көмө миэрэлэрин туһаныы, үөрэнии, үлэ булуу боппуруостарыгар консультациялары ыытыы салҕанар. Араас тэрилтэлэр бэрэстэбиитэллэрин кытта барыта 66 көрсүһүү ыытыллыбыт.

Ил Дархан, бырабыыталыстыба пресс-сулууспата.