Байыастар дьиэ кэргэттэриттэн 1086 устудьуон анал истипиэндьийэни ылар

Саха сиригэр СӨ Үөрэҕин уонна билимин министиэристибэтинэн байыаннай дьайыы кыттыылаахтарыгар уонна кинилэр оҕолоругар анаан уонтан тахса өйөбүл миэрэтэ үлэлиир. Олор истэригэр — бүгүҥҥү күҥҥэ 1086 устудьуоҥҥа анаммыт анал истипиэндьийэ баар.

Бу туһунан СӨ Үөрэҕин уонна билимин миниистирин бастакы солбуйааччы Михаил Присяжнай брифинг кэмигэр иһитиннэрдэ. Михаил Присяжнай бэлиэтээбитинэн, бу миэрэ үрдүк да, орто да анал үөрэх тэрилтэлэригэр үөрэнээччилэри киэҥник хабар. Истипиэндьийэни ылар 1086 киһиттэн 40%-ын кэриҥэтэ үрдүк үөрэх кыһаларыгар, академияларга уонна институттарга, оттон 60%-нара — дойду үрдүнэн кэллиэстэргэ уонна тиэхиньикумнарга үөрэнэллэр. Төлөбүр кээмэйэ 6 547 солкуобай буолар.

Миниистири бастакы солбуйааччы өссө маннык санатта: «2024 сыл алтынньытыгар РФ Бырабыыталыстыбатын Украина, Донецкай уоннa Луганскай Норуодунай Өрөспүүбүлүкэлэрин, ону тэҥэ Запорожскай уонна Херсонскай уобаластар территорияларыгар байыаннай дьайыы кыттыылаахтарыгар чэпчэтиилэри быһаарар бэрээдэгин туһунан уурааҕа тахсыбыта. Онон сибээстээн, анал истипиэндьийэни ыларга ирдэнэр докумуоннар испииһэктэригэр чуолкайдыыр уларытыылар киллэрилиннилэр».

Билигин устудьуоннар туттарыахтаахтар:

• – үөрэнэр сириттэн ыспыраапканы;
• – харчы түһэриллэр лицевой счетун реквизиттэрин;
• – РФ гражданина байыаннай дьайыыга кыттыбытын бигэргэтэр ыспыраапканы.

«Биһиги бары үөрэнээччилэргэ үчүгэй, ситиһиилээх үөрэҕи баҕарабыт. Уонна истипиэндьийэни таһынан, маннык дуогабардар түһэрсиллэр хайысхаларыгар өйөбүл миэрэлэринэн хааччыллан, сыаллаах үөрэх дуогабарын бастакынан түһэрсэр кыах баар. Бу үөрэх кэмигэр көмө мэктиэтин эрэ буолбакка, үөрэх кэнниттэн үлэнэн хааччыллыы мэктиэтин эмиэ биэрэр», — диэн Михаил Присяжнай бэлиэтээтэ.