Байыастар дьонноругар көмөлөстүлэр

Бурнашев Ньургун Фёдорович салайааччылаах «Якутлесресурс» Уус Алданнааҕы салаата уонна Мүрүбүт нэһилиэгин ытык олохтооҕо Василий Васильевич Аргунов байыастар дьиэ кэргэттэрин Байдыма эбэ соботунан күндүлээтилэр.

Уопсайа 14 ыалга (Мүрү, Мындааба, Дьокуускай, Танда,Чэриктэй) 6 куул собону үллэрдилэр. Онон бу кыстык астарыгар эбиискэ көмө буолла диэн бар дьон үөрэллэр. Манна даҕатан эттэххэ, ытык киһибит Баһылай Аргунов байыастар дьонноругар быйыл иккиһин балыктаан түҥэттэ.

Биһиги бука бары балыксыттарбытыгар барҕа махтал тылларын этэбит, муҥхаһыттарбытыгар муҥура суох толору дьоллоох олоҕу баҕарабыт!

Маргарита Крылова, Луиза Бурнашева,

Уус Алдан.

Хаартыскалар: Луиза Бурнашева тиксэриилэрэ