Байыастар “Өлбөт үйэлээх полк” аахсыйаҕа кытыннылар

Байыаннай дьайыыга сылдьар Саха сирин байыаннай сулууспалаахтара “Өлбөт үйэлээх полк” Бүтүн Арассыыйатааҕы аахсыйаҕа кытыннылар диэн Саха сирин эрэгийиэннээҕи салаатыгар иһитиннэрдилэр.

“Инники кирбиигэ өлбөт үйэлээх полк” көрүҥэ – көннөрү аахсыйа буолбатах, көлүөнэлэри, ааспыт уонна билиҥҥи кэми ситимниир самныбат бэлиэ. Биһиэхэ, Саха сирин олохтоохторугар Аҕа дойду Улуу сэриитин сылларыгар Ийэ дойдуларын көмүскээбит эһэлэрбит, хос эһэлэрбит хорсун быһыыларын туһунан өйдөбүл, кэриэс. Бүгүн кинилэр удьуордара – биһиги буойуннарбыт, инники кирбиигэ туран эр санаа эстафетатын салгыы туталлар. Биһиги байыастарбытыттан уонунан видео-эҕэрдэлэри тутабыт”, – диэн Саха сиригэр “Өлбөт үйэлээх полк” эрэгиэйиэннээҕи хамсааһын салайааччыта Ньургуйаана Стручкова этэр.

Байыаннай дьайыы бара турар сиригэр “Өлбөт үйэлээх полк” аахсыйаҕа кыттыы – бу устуоруйаны уонна эйэлээх олох иһин олохторун толук уурбуттары  дириҥник ытыктыылларын туоһута диэн кини бэлиэтиир. Бу туһунан Ил Дархан уонна Бырабыыталыстыба пресс-сулууспата суруйар.