Байыастар наҕараадаларын чугас дьонноругар туттардылар

Бэс ыйын 24 күнүгэр «Аҕа дойдуну көмүскээччилэр» пуонда филиалыгар анал байыаннай дьайыыга сырдык тыыннара быстыбыт байыастар чугас дьонноругар судаарыстыбаннай наҕараадалары туттардылар. Бу быйылгы сылга хаһыс да туттарыылара буолар.

Наҕараадалары байыастар кэргэттэригэр, төрөппүттэригэр, оҕолоругар Саха сирин байыаннай хамыһаарын солбуйааччы Алексей Рыжавскай туттарда. Сорохтор оҕолорун илдьэ кэлбиттэр. Тулаайахсыйбыт кырачааннар харахтарыгар аҕаларынан киэн туттуу уота көстөр…

«Аҕа дойду көмүскээччилэрэ» пуонда Саха сиринээҕи салаатын салайааччы Алексей Александров байыастарга махтанан, сүгүрүйэн туран, тыл эттэ.

Ол курдук, бойобуой соруктары толорууга көрдөрбүт хорсун быһыыларын иһин «Эр санаа» уордьанын Павел Винокуров, Даниил Саввинов, Андрей Баишев, Семён Захаров, Револий Саввин, Ким Прокопьев, Павел Захаров, Афанасий Данилов чугас дьонноругар туттардылар.

«Эр санаа» уордьанын уонна «Хорсунун иһин» мэтээл II истиэпэнин Айдар Шаймарданов дьонугар туттардылар. «Хорсунун иһин» мэтээлинэн Анатолий Лопатюк наҕараадаламмыта. Иван Егоровка анаммыт, байыаннай дьайыы кыттыылааҕын мэтээлин чугас дьонугар туттардылар.

Харах уулаах, санньыар тыыннаах тэрээһиҥҥэ, кыргыһыы толоонугар олохторун толук уурбут буойуттары ахтан-санаан аастылар. Кинилэр ыарахан кэмҥэ Ийэ дойдуларын көмүскүү туруммуттара, түөстэрин тоһуйан биэрбиттэрэ, дьоруойдар хорсун быһыылара умнуллуо суохтаах, ааттара ааттаныахтаах, үйэлэргэ өлбөөдүйүө суохтаах.