Байыастар ОДьКХ министиэристибэтигэр стажировканы саҕалаатылар

Олох-дьаһах, хомунаалынай хаһаайыстыба уонна энэргиэтикэ министиэристибэтигэр «Саха сирэ – Дьоруойдар дойдулара» эрэгийиэннээҕи каадыр бырайыагын кыттыылаахтара Гаврил Наумов уонна Николай Неустроев стажировкаланаллар.

Стажировка бастакы күнүгэр эдэр исписэлиистэр СӨ «Субсидия ааҕыныстыбата» судаарыстыбаннай хааһына тэрилтэтигэр сырыттылар. Тэрилтэ үлэһиттэрэ үлэ сүрүн хайысхаларын билиһиннэрдилэр: хомунаалынай комплекс тэрилтэлэригэр субсидия биэрии уонна гражданнарга олох-дьаһах, хомунаалынай өҥө иһин хоромньуну толуйуу.

Уһуйааччылара этэринэн, тэрилтэ салаа бигэ туруктаах буолуутун уонна саха сирин олохтоохторун социальнай өйөбүлүн хааччыйыыга улахан суолталаах. «Бырайыакка кыттыы – бу бастыҥ уопуту ылынар эрэ буолбакка, төрөөбүт эрэгийиэҥҥэ бэйэ кылаатын киллэрэр кыах биэрэр», – диэн Гаврил Наумов бэлиэтээтэ. Онтон Наумов уонна Неустроев Элбэх кыбартыыралаах дьиэлэр хапытаалынай өрөмүөннэрин пуондатыгар сырыттылар, онно пуонда дириэктэрэ Олег Маклашовы кытта билистилэр. Салайааччы өрөмүөн үлэтин былаанныыр, үбүлүүр уонна хонтуруоллуур ньымаларын туһунан сиһилии кэпсээтэ, ону таһынан тыа улуустарыгар холобур буолар бырайыактары олоххо киллэриигэ стажердар ыйытыыларыгар эппиэттээтэ.

«Биһиэхэ, инникитин ОДьХХ эйгэтигэр соруктары көдьүүстээхтик быһаарар туһугар, идэлээхтэртэн уопут ыларбыт улахан суолталаах. Пуондаҕа көрсүһүү олус туһалаах буолла – биһиги инники үлэбитигэр көмөлөһүөхтээх чопчу холобурдары уонна үлэ ньымалары ырыттыбыт», – диэн Гаврил Наумов эттэ.