Байыастар оҕолоро уонна төрөппүттэрэ куйуурдаатылар

Саха сиригэр Уол оҕо күнүн чэрчитинэн анал байыаннай дьайыы кыттыылаахтарын дьиэ кэргэттэригэр үгэскэ кубулуйбут муус аннынан балыктааһыны тэрийдилэр.

Бырааһынньык күнү көҕүлээччинэн Дьокуускай куорат Дууматын дьокутаата Яков Оконешников тэрийдэ. Сэргэх тэрээһини СӨ буойуннарын дьиэ кэргэттэрин кэмитиэтэ, баартыйа уопсастыбаннай өйөбүлүн ыстааба, Дьокуускай куорат аҕаларын Сэбиэтэ уонна «Саха гимназията» оскуола өйөөтүлэр.

Ыалдьыттары Ильиновтар дьиэ кэргэттэрин аҕа ууһун общината көрүстэ. Кинилэр төрөппүттэргэ уонна оҕолорого умнуллубат сааскы күннэри бэлэхтээтилэр: сибиэһэй салгыҥҥа оонньоотулар, сылгынан, табанан хатааһылаатылар, кутаа уот аттыгар олорон сахалыы үгэстэри, сиэри-туому кытта билсистилэр. Тэрээһин түмүгэр муус аннынан балыктааһын — куйуурдааһын буолла. Ол курдук, бары кыттааччылар Күөх Боллох Тойон бэлэҕин тутан тарҕастылар. Оҕолорго кыттыбыттарын иһин сэртипикээттэри уонна минньигэс бэлэхтэри туттардылар. Сааскы кэмҥэ оҕолору илдьэ сылдьан муус аннынан балыктааһын ньыматыгар уонна куйуурга үөрэттилэр. Сэргэх тэрээһиҥҥэ оҕолор айылҕалыын алтыһан, дьиҥ саха эр киһитэ туттар булт ньымаларын кытта билсистилэр.

«Айылҕаҕа олус үчүгэй өрөбүл күннэрэ буолан аастылар. Бу кылгас кэмҥэ оҕолор уонна төрөппүттэр балыктаатылар, сылгыга, табаҕа хатааһылаатылар. Бары кыттыылаахтарга уонна тэрийээччилэргэ махталбытын тиэрдэбит. Ильиновтар дьиэ кэргэттэригэр, чуолаан ыалдьытымсах Раиса Анатольевнаҕа анаан туспа махтанабын»,- диэн тэрээһин тэрийээччитэ Яков Оконешников эттэ. Бу туһунан «Биир Ньыгыл Арассыыйа» баартыйа пресс-сулууспата суруйар.