Байыастар үлэнэн хааччыллаллар

Дьарыктаах буолуу сулууспатын көмөтүнэн 36 байыас уонна кинилэр дьиэ кэргэттэриттэн 110 киһи үлэнэн хааччыллыбыттар.

Нэһилиэнньэ дьарыктаах буолуутун сулууспатын органнара бу хайысхаҕа үлэлэрин салгыыллар.

«Ахсынньы 25 күнүнээҕи туругунан, нэһилиэнньэ дьарыктаах буолуутун сулууспатыгар 90 байыас үлэ көрдүүрүн туһунан иһитиннэрбит. Кинилэртэн бүгүҥҥү күн туругунан, 36 киһи үлэнэн хааччыллыбыт. Ол курдук «Янолово», «Алмазы Анабара», «Эльга-фабрика», ОДьКХ ГУП, Дьокуускай куорат аэропордугар үлэҕэ киирбиттэр» , –  диэн иһитиннэрэр брифиҥҥэ СӨ нэһилиэнньэ дьарыктаах буолуутун киинин бэрэссэдээтэлин солбуйааччы Георгий Борисов.  Кини бу дьон «Водитель погрузчика», «Машинист бульдозера», «Машинист экскаватора», «Слесарь КИПиА», «С», «Д», «Е» категорияларга үөрэммиттэрин уонна эбии үөрэммиттэрин бэлиэтиир.

Оттон алта байыас бэйэ дьыалатын арыйарга үбүнэн өйөбүлү ылбыт.

Дьарыктаах буолууну көҕүлүүр судаарыстыбаннай өҥөлөр байыастар дьиэ кэргэттэрин чилиэннэригэр эмиэ оҥоһуллаллар. Ол курдук, байыастар дьиэ кэргэттэриттэн 176  киһи дьарыктаах буолуу сулууспатыгар сылдьыбыт, кинилэртэн 110 киһи үлэнэн хааччыллыбыт, 44 киһи үөрэммит. Дьарыктаах буолуу сулууспатын өйөбүлүнэн 20 киһи бэйэ дьыалатын тэриммит. Ол курдук, хаартыскаҕа түһэриинэн дьарыктанарга, көмөлтө хаһаайыстыбаны тэринэргэ, массаастыырга, дьону киэргэтэр өҥөҕө ылсыбыттар.

СӨ Ил Дарханын уонна Бырабыыталыстыбатын пресс-сулууспата