Туһалаах сынньалаҥ

Саха сирин Москватааҕы «Бэс Чагда» санаторийыгар уоппускаҕа кэлбит байыастар, госпиталларга эмтэнэн баран салгыы реабилитация ааһар ыччаттарбыт бааллар.

Кинилэри кытта тэҥҥэ сылдьан, күн аайы көрсөн, кэпсэтэн, киһи тугунан эмэ көмөлөһүөн, кыратык да буоллаҕына кинилэр санааларын чэпчэтиэн баҕарар. Бука, маннык түгэни таба өйдөөтөхтөрө, санаторийга култуура өртүгэр сынньалаҥы тэрийээччинэн үлэлиир Аида Васильевна Макарова бэйэлэрин баҕаларынан көмөлөһөөччүлэри түмэн араас өрүттээх үлэни тиһиктээхтик тэрийэн ыытар.

Ол курдук, эмтэнэрбитин, сынньанарбытын таһынан, туһалааҕынан эмиэ дьарыктанабыт. Байыастарга көмөлөһөр сыаллаах волонтёр Аида Васильевна үгүс өрүттээх үлэтигэр аҕыйах да күн буоллар кыттыһан, санаабыт чэпчээтэ. Анаан тэриллибит «Амарах санаа хоһугар» харысхал сиэккэлэри оҥорон, бадарааҥҥа атахтарын таҥаһын илиппэт биирдэ кэтэр бахилалары тигэн, иһэр ууларын сүгэр суумкалары булан ыытарга бэйэбит кылааппытын киллэристибит. Маннык үлэни тэрийэр үтүө санаалаах Айыы кыыһа Аидаҕа үлэтигэр ситиһиилэри баҕарабыт. Үгэскэ кубулуйбут үлэтин аҕыйах да кэмҥэ кэлэн барар эмтэнээччилэр тиһигин быспакка салгыы туруохтарыгар, көмөлөһүөхтэригэр эрэнэбит.

Нина Саввина

Хаартыскалар: ааптар тиксэриилэрэ