Байыастарга 436 баһыылка тиэрдилиннэ

Саха сириттэн сылдьар байыаннай сулууспалаахтарга тирэх пууннар үлэһиттэрэ биир нэдиэлэ иһигэр чугас дьонноруттан, доҕотторуттан, кэлиэгэлэриттэн кэлбит 436 баһыылканы тиксэрдилэр. Тирэх пууннар экипажтара Запорожскай, Луганскай, Курскай, Белогородскай хайысхаларынан 25 сырыыны оҥордулар.

Бу туһунан «Юстас» диэн ыҥырыллар ааттаах, Саха сирин тирэх пууннарын сүрүн координатора брифиҥҥэ кэпсээтэ.

— Маны таһынан, мотострелковай пуолкаҕа уонна спецназ биригээдэтигэр сулууспалыыр байыастарга икки массыына тиэрдилиннэ. Байыастарга тустаах баһыылкалары таһынан, кыраапык быһыытынан эбии тэриллэри, ол иһигэр беспилотниктары, сибээс сириэстибэлэрин тиэрдэ турабыт, — диэн кини кэпсээтэ.

Тирэх пуун мэхээньиктэрин бөлөҕө бу сыл саҕаланыаҕыттан 22 «Якт-Сокол» квадроциклы, 7 тырааныспары өрөмүөннээн баран, сэрии чаастарыгар төттөрү тиэрдибиттэр.

— Тирэх пууннар үлэһиттэрэ Арассыыйа Сэбилэниилээх күүстэрин «Центр», «Восток», «Южная» подразделениеларын көдьүүстээх бойобуой дьайыылар ыытыллалларын туһугар, тиһигин быспакка, анал тэриллэринэн хааччыйа тураллар, —  диэн «Юстас» иһитиннэрдэ.

Ил Дархан, бырабыыталыстыба пресс-сулууспата.