Байыастарга абыраллаах тиэхиньикэ

Байыаннай дьайыы буола турар сиригэр-уотугар сылдьар кэммитигэр РФ бэрэсидьиэнигэр Саха сирин бастайааннай бэрэстэбиитэлэ — СӨ бырабыыталыстыбатын бэрэссэдээтэлин бастакы солбуйааччы Андрей Федотов Ил Дархан Айсен Николаев аатыттан «Боотур» этэрээт уонна «Ахмат» батальон байыастарыгар Саха сиригэр оҥоһуллубут «Сокол» вездеходтары туттартаата.

«Боотур» этэрээт уонна «Ахмат» батальон байыастара бары бииргэ сомоҕолоһон, Арассыыйа кыайарын туһугар туруулаһаллар. «Ахмат» батальоҥҥа «Сокол» вездеходу «Якудза» диэн позывнойдаах байыас сайаапкатынан бэрилиннэ. «Хомойуох иһин, кини бу түгэҥҥэ диэри тиийбэтэ, сэрии хонуутугар хорсуннук оҕунна. Кини хорсун, быһаарыылаах, күүстээх
санаата бииргэ сулууспалыы сылдьар доҕотторун сүрэҕэр үйэлэргэ хаалыаҕа. Бу туохтан да иҥнибэт тиэхиньикэ эһиэхэ күүс-көмө буоллун», — диэн Андрей Федотов эттэ.
«Ахмат» хамандыыра «Шрам» Саха сирин олохтоохторугар уонна чахчы эр санаалаах буойуну иитэн таһаарбыт төрөппүттэргэ махтанна. «Саха уолаттарын кытта бииргэ сулууспалыыр — чиэс-бочуот.

Саха сирэ туохтан да куттаммат, тулуурдаах байыастары иитэн-такайан таһаарар. Оттон Саха сирин көмөтүгэр биһиги бары ис сүрэхпититтэн махтаныах эрэ тустаахпыт», — диэтэ.

«Злой» позывнойдаах «Боотур» батальон хамандыыра Саха сирин олохтоохторун быһаччы көмөлөрүнэн кыайыы күнтэн күн чугаһаан иһэрин туһунан эттэ. «Сокол» күлүүстэрэ туттарыллыбыттарын кэнниттэн, Донецкайга баар тирэх пууҥҥа үлэлиир волонтер-суоппар Игорь байыастарга вездеход тиэхиньиичэскэй уратытын сиһилии бэрт судургутук
быһааран биэрдэ. Байыастар барытын болҕойон иһиттилэр уонна вездеход туһунан интэриэһиргиир ыйытыыларын биэрэн сөптөөх хоруйу ыллыллар. Бэрт сотору буолаат, икки вездеход байыастарга күүс-көмө буола сэрии бүтэҥи тыаһа-ууһа иһиллэр сирин- уотун диэки айаннаата. Биһиги: “Кытаатыҥ, байыастарга көмө-тирэх буолуҥ”, — диэн алгыс тылбытын аныы хааллыбыт.

Манна даҕатан эттэххэ

Санатар буоллахха, былаан быһыытынан Саха сирин байыастарыгар туохтан да иҥнибэт итинник 50‑тан тахса тиэхиньикэ оҥоһуллан тиэрдиллиэхтээх. «Сокол» вездеход байыастарга сэрии сэбин-сэбиргэлин, аһы-үөлү тиэрдиигэ уонна, саамай сүрүнэ, бааһырбыт байыастары байыаннай дьайыы хонуутуттан таһаарарга тугунан да кэмнэммэт улахан көдьүүстээх.

Запорожье—Дьокуускай—Запорожье.