Байыастарга анаан үлэ дьаарбаҥката тэриллиэ

Каадыр киинэ олунньу 27 күнүгэр байыастары үлэнэн хааччыйыыга анаан Дьокуускайга тэрээһин ыытар.

Манна 15 улахан тэрилтэ кэлэн кыттыыны ылыаҕа. Бу туһунан нэһилиэнньэ дьарыктаах буолуутун киинин дириэктэрин солбуйааччы Игорь Соловьев эттэ.

«Бойобуой дьайыылар бэтэрээннэригэр үлэ миэстэлэрин билиһиннэриэхтэрэ, усулуобуйаны кэпсиэхтэрэ. Үлэ көрдөнөөччүлэр бары өйөбүлү ылыахтара. Бу тэрээһиҥҥэ байыастар улуустарыттан кэлбэккэ эрэ онлайн-форматынан кыттыахтарын эмиэ сөп. Онон кинилэр улуустарыгар дьарыктаах буолуу кииннэригэр билсиэхтэрин наада. Онно кинилэри кэпсэтэллэригэр анаан холбоон биэриэхтэрэ«, — диэн быһаарар Игорь Соловьев.

Бу күн үлэ миэстэтин «Эльгауголь» ХЭУо, «ЯТЭК» ПАУо, «Саханефтегазсбыт», «Теплоэнергосервис», «Саханефтегаз» АУо, «Колмар» ХЭУо, ЮВГК, «Алмазы Анабара» АУо, «Дороги Арктики» КП, «Якутскэнерго» ПАУо, «Нерюнгри-металлик» ХЭУо, «Сахаэнерго», «Золото Селигдара» АУо, «Администрация Ленского бассейна» ФБК, «ЛОРП» ПАУо билиһиннэриэхтэрэ.

Игорь Соловьев иһитиннэрбитинэн, маны сэргэ, дьарыктаах буолуу кииннэрэ байыастар кэргэттэригэр эмиэ дьаарбаҥка оҥорору былаанныыллар. Дьахталлар Аан дойдутааҕы күннэрин көрсө тэриллэр тэрээһини кулун тутар 4-8 күннэригэр өрөспүүбүлүкэ бары улуустарыгар былаанныылар.

СӨ нэһилиэнньэ дьарыктаах буолуутун киинэ байыаннай дьайыы кыттыылаахтарын уонна кинилэр дьиэ кэргэттэрин чилиэннэрин үлэнэн хааччыйыытын салгыыр.

Сыл саҕаланыаҕыттан эрэгийиэҥҥэ дьарыктаах буолуу кииннэригэр 57 байыас уонна кинилэр дьиэ кэргэттэриттэн 55 киһи үлэ миэстэтэ ыйыталаспыт. Бойобуой дьайыы аҕыс бэтэрээнэ уонна кинилэр дьиэ кэргэттэрин алта чилиэнэ үлэ булбуттар. Ол курдук менеджер, экэнэмиис, харабыл, биэлсэр, эбии үөрэхтээһин педагога, техник-радиооператор, уо.д.а. үлэлииллэр. Биир байыас автобус суоппара буоларга үөрэххэ ыытыллыбыт.

СӨ Ил Дарханын уонна Бырабыыталыстыбатын пресс-сулууспата