Уус Алдан олохтоохторо байыастарга хаххалыыр сиэккэлэри бэлэмнээтилэр

Сэтииньи бүтүүтэ Уус Алдан улууһуттан байыаннай дьайыыга сылдьар уолаттарбытыгар дэлэгээссийэ барыахтаах.

Онно анаан дугда-хахха буоллун диэн хаххалыыр сиэккэни баайыыга аахсыйа биллэрбиппит. Маннык сиэккэлэр наһаа наадалаахтарын, өлөр өлүүттэн элбэхтик быыһаабыттарын байыас уолаттарбыт кэпсииллэрин элбэхтэ истэбит.
Ол иһин, турунан туран уопсайа 30 хаххалыыр сиэккэни улууспут нэһилиэктэриттэн түмсүүлэр, тэрилтэлэр, оскуола оҕолоро, уолаттарбыт ийэлэрэ, кэргэттэрэ, балыстара, эдьиийдэрэ күннээҕи үлэлэрин кэнниттэн анаан-минээн түмсэн баайан бүтэрдилэр.

Манна даҕатан эттэхпинэ, «Күндүүнэ» диэн үнкүү-ырыа түмсүүтүн бэтэрээннэрэ ис сүрэхтэриттэн кыһаллан көмөлөһөллөр. Көмөлөһүҥ, өйөбүл буолуҥ диэн көрдөстүбүт да, бастакынан кэлэллэр. Хаххалыыр сиэккэни оҥоро сылдьан куруук ыллаан, кэпсээн-ипсээн түргэн үлүгэрдик иккилии улахан сиэккэни бүтэрэн тэйэллэр. Маннык үтүөкэн үлэһит, амарах санаалаах дьонноох-сэргэлээх буоламмыт, икки ый устатыгар улахан, күүстээх үлэ ыытылынна. Маны сэргэ, уран тарбахтаах элбэх иистэнньэҥ түмсэн, байыастарга анаан тикпит таҥастара-саптара эмиэ ситтэ-хотто. Билигин ол барыта бииргэ түмүллэр.

Уолаттарбытыгар көмөлөөх буоллун диэн кыһаллан туран бу аахсыйаҕа кыттыспыт бар дьоммутугар махталбыт муҥура суох. Куруук өйдүүр, өйүүр көмөлөһөөччүлэрдээх, дойдуларын олус таптыыр, бэриниилээх, түмсүүлээх дьонноох-сэргэлээх буоламмыт, бу барыта кыайа-хото тутуллар. Түгэнинэн туһанан бу курдук үүнэр көлүөнэҕэ үтүө холобур буола туруҥ диэн диэн баҕа санаабытын тиэрдэбит.

Саргылана Никитина.

Ааптар хаартыскаларга түһэриитэ