Байыастарга өссө 15 массыынаны ыытыахтара

Саха сириттэн байыастарга быйыл 129 көлө тиэрдиллибит. Мууһунан сырыы көҥүллэннэҕинэ, байыаннай дьайыы буола турар сиригэр байыастарга өссө 15 массыынаны ыытыахтара.

Бу туһунан Донбасска көмөлөһөр уонна өйүүр Хотугулуу-Илиҥҥи пуонда салайааччыта Георгий Куркутов эттэ.

—СӨ култууратын уонна үөрэҕин тэрилтэлэрин аатыттан өссө тиэхиньикэлэр ыытыллаары тураллар. Көлөлөр тэхиньиичэскэй туруктарын, уустук суолга-иискэ бэлэмнэрин бэрэбиэркэлииллэр, — диэн этэр кини.

Георгий Куркутов бу күннэргэ госпиталларга сытар байыастарга гуманитарнай көмө ыытыллыбытын иһитиннэрдэ. Баһыылкалар Приморье, Хабаровскай кыраай, Москва, Санкт-Петербург куораттарга байыаннай мэдиссиинискэй тэрилтэлэргэ тиэрдиллибиттэр.

—Үлэ барыта байыаннайдары, байыаннай дьайыы буола турар сиригэр баар тирэх пууннары уонна эрэгийиэн волонтердарын түмсүүлэрин кытта ыкса ситимнээх ыытыллар. «Бары бииргэ Кыайыыга!» өрөспүүбүлүкэтээҕи хамсааһын байыаннай сулууспалаахтары эбии хааччыйыыга былааннаах үлэтин салгыыр, — диир Георгий Куркутов.

Сиһилии: https://www.sakha.gov.ru/news/16116

СӨ Ил Дарханын уонна Бырабыыталыстыбатын пресс-сулууспата