Байыастарга өссө түөрт тимир көлөнү тиэртилэр

Донбасска көмөлөһөр уонна өйүүр Хотугулуу-Илиҥҥи пуонда, ону тэҥэ атын уопсастыбаннай тэрилтэлэр байыаннай сулууспалаахтарга өссө түөрт тиэхиньикэни босхо туттардылар.

Бу туһунан Анал байыаннай дьайыы зонатыгар өрөспүүбүлүкэ тирэх пууннарын «Юстас» позывнойдаах сүрүн координатора иһитиннэрдэ.

«Отчуоттуур кэм иһигэр Новоазовскай уонна Белгород куораттарга баар тирэх пууннар үлэһиттэрэ 25 сырыыны оҥордулар. 98 киһиэхэ 245 баһыылка тиэрдилиннэ. Ону таһынан, мэхээньиктэр бөлөхтөрө миэстэтигэр 7 тиэхиньикэни чөлүгэр түһэрэн өрөмүөннээтилэр, билигин өссө 4 тиэхиньикэ өрөмүөҥҥэ турар», — диэн «Юстас» кэпсээтэ.

Кини эрэгийиэннэр икки ардыларыгар байыаннай сулууспалаахтар кэргэттэрин өйөөһүн хайысхатыгар хардарыта үлэҕэ улахан болҕомто уурулларын бэлиэтээтэ. Белгород куораттааҕы тирэх пууҥҥа Саха сиринээҕи «Аҕа дойду буойуннарын кэргэттэрин кэмитиэтэ» АКО бэрэссэдээтэлэ Марина Бахилина көмөтүнэн Курскай уобаластааҕы «Аҕа дойду буойуннарын кэргэттэрин кэмитиэтэ» АКО, Курскай уобаластааҕы «Аҕа дойду көмүскээччилэрэ» пуонда бэрэстэбиитэлэ Татьяна Банниковалыын, Белгород уобаластааҕы «Аҕа дойду көмүскээччилэрэ» пуонда бэрэстэбиитэлэ Анна Кочеровалыын, «Аҕа дойду буойуннарын кэргэттэрин кэмитиэтэ» юридическай сулууспатын салайааччыта Александр Терновцовтыын көрсүһүүлэр буоллулар. Хардарыта үлэни кэҥэтии, ону тэҥэ Курскай уонна Белгород уобаластарын госпиталлара дойду атын эрэгийиэннэрин бэрэстэбиитэллэригэр тиийимтиэ буолууларын боппуруостара дьүүллэһилиннилэр.

Волонтердар байыаннай госпиталлар приемнай салааларыгар мэлдьи көмөлөһөллөр. Саха сириттэн сылдьар байыаннай сулууспалаахтары социальнай арыаллааһын чэрчитинэн атын госпиталларга көһөрүүгэ, маҥнайгы наадалаах табаардары атыылаһарга, бастакы психологическай көмөнү оҥорууга көмөлөһөллөр. Эбии информационнай уонна консультационнай өйөбүл, ону тэҥэ социальнай өҥөлөрө оҥоһуллаллар.