Байыастарга кэлим көмө оҥоһуллар

Үлэ, социальнай сайдыы министиэристибэтин хайысхатынан, чөлгө түһэрэр кииннэр анал байыаннай дьайыы байыастарын доруобуйаларын, уйулҕаларын чөлгө түһэриигэ, идэлэрин уларытыыга, үлэ булууга, о.д.а. көмөлөһөр бырагыраамалары оҥордулар. Кинилэр дьиэ кэргэттэригэр, оҕолоругар эмиэ көмөлөһөллөр.

Өрөспүүбүлүкэтээҕи инбэлииттэри социальнай-чэбдигирдэр кэлим киин дириэктэрэ Асида Алексеева бу туһунан сиһилии кэпсээтэ:

— Бу бырагыраамабыт сүрүн соруктара – байыастары социальнай өйөөһүн, кинилэр доруобуйаларын эрэ чөлгө түһэрии буолбакка, уопсастыбаҕа социальнай адаптацияны баралларын ситиһии, психологтар көмөлөрө, о.д.а. Хас биирдии байыаска настаабынньык сыһыарыллар. Ону тэҥэ, дьиэ кэргэттэригэр эмиэ көмө оҥоһуллар.

Билигин биһиги кииммитигэр 81 байыас уонна кинилэр дьиэ кэргэттэриттэн 50 киһи кэлим көмөнү ыллылар.

Кинилэр үлэни булалларыгар сүрүн болҕомтобутун уурабыт. Үгүстэр хос үөрэниэхтэрин, бэйэ дьыалатын арынарга социальнай хантараак ылыахтарын баҕараллар. Ону тэҥэ, бырамыысыланнай тэрилтэлэргэ баахтанан үлэ эмиэ интэриэһиргэтэр. Чааһынай дьиэлэри гаастааһыҥҥа, федеральнай, эрэгийиэннээҕи төлөбүрдэри ыларга, о.д.а. юрист сүбэтин туһаналлар, — диэн кэпсээтэ.

Кэлим өҥөлөрү кэҥэтэргэ “Самородок” бассейнҥа гидрокинезиотерапия дьарыктара нэдиэлэҕэ иккитэ ыытыллаллар. Бу хамсаналларыгар, ньиэрбэлэрин сынньаталларыгар олус туһалаах. Ону тэҥэ, атынан айаннатыы, Арчы дьиэтин алгыстара эмиэ көмөлөһөллөр.

Ил Дархан, бырабыыталыстыба дьаһалтатын пресс-сулууспата.