Байыастарга анаан сааны туттарарга сайаапканы онлайн биэриэххэ сөп

Саха сиринээҕи Росгвардия управлениетын официальнай саайтыгар 14.rosguard.gov.ru  байыаннай дьайыыга сэби-сэбиргэли туттарар туһунан иһитиннэриилэри хомуйар онлайн сервис үлэлээн саҕалаата.

Ол курдук, саа бас билээччитэ анал сервиска анкета толорор. Онно кини тус дааннайдарын,  көҥүллүүр докумуоннарын нүөмэрдэрин уонна сибээскэ тахсар контактарын ыйар. Бу үлэ барыта биэс мүнүүтэттэн ордуга суох кэми ылар.

Ити кэнниттэн бас билээччигэ лицензионнай-көҥүллүүр үлэ салаатын үлэһиттэрэ сибээскэ тахсан, сааны туттарарга табыгастаах күнү-дьылы уонна бириэмэни чуолкайдаһаллар. Сорох түгэннэргэ иниспиэктэрдэр бэйэлэрэ гражданиҥҥа тиийиэхтэрин сөп.

Санатан эттэххэ, ааспыт сылга олохтоохторон байыаннай дьайыыга 250-тан тахса саа хомуллубута диэн  Росгвардия Саха сиринээҕи управлениетын пресс-сулууспата иһитиннэрэр.