Байыастарга Саха сириттэн сөмөлүөт тииптээх дроннары ыыттылар

Өрөспүүбүлүкэ суһал ыстааба байыаннай дьайыы зонатыгар бойобуой соруктары толорор Саха сириттэн сылдьар байыастарга анаан сөмөлүөт тииптээх пилота суох көтөр аппарааттары (БПЛА) тиксэрдэ. Бу туһунан СӨ Гражданскай оборуона дьыалаларыгар уонна нэһилиэнньэ олоҕун куттала суох буолуутун хааччыйыыга миниистирин солбуйааччыта Яна Наумова иһитиннэрдэ. Бу туһунан sakha.gov.ru саайта иһитиннэрэр.

Кини бэлиэтээбитинэн, сөмөлүөт тииптээх БПЛА-лар разведкаҕа уонна сыалы чопчу ыйан биэриигэ аналлаахтар. «Ону таһынан, өрөспүүбүлүкэ тирэх пууннарыттан биирдэстэригэр Саха сириттэн тиэхиньикэлээх уонна гуманитарнай көмөлөөх уочараттаах рейсэтэ кэллэ. Бу рейсинэн байыаннай дьайыы зонатыгар саха инженера-мэхээньигэ Дмитрий Павлов оҥорбут «Якутянка» диэн ааттаах эвакуациялыыр сыарҕалар эмиэ тиэрдилиннилэр.

Эвакуациялыыр сыарҕалар байыаннай дьайыы хонуутугар туһанарга табыгастаахтарын уонна көдьүүстээхтэрин көрдөрдүлэр. Бу сыарҕалары өрөспүүбүлүкэҕэ оҥорон таһаарыы уонна байыастарга ыытыы салҕанан барыаҕа», – диэн биэдэмистибэ салайааччытын солбуйааччыта иһитиннэрдэ. Итини таһынан, Яна Наумова тирэх пууннар байыастарга наадалаах эбии тэриллэри бигэргэтиллибит кыраапык быһыытынан үлэ эрэсииминэн туттаралларын бэлиэтээтэ.