Байыастарга Саҥа дьыллааҕы бэлэхтэри туттарыахтара

Хас биирдии байыаннай сулууспалаахха Саҥа дьыл бэлэхтэрэ туттарыллыахтара.

Бу туһунан «Бары бииргэ —  Кыайыыга!» өрөспүүбүлүкэтээҕи хамыыһыйа суһал ыстаабын координационнай киинин бэрэстэбиитэлэ Анна Меркурьева иһитиннэрэр.

—Бу күннэргэ бырааһынньыктааҕы нобуору оҥоруу салҕанар. Бэлэхтэр Москваҕа, Санкт-Петербурга, Улан-Удэҕэ, Приморье, Хабаровскай кыраайдар госпиталларыгар уонна байыаннай дьайыы буола турар сиригэр-уотугар ыытыллыаҕа. Бу олохтоох бэйэ оҥорон таһаарар аһа-үөлэ буолар.  Балыктан, эттэн ас-үөл арааһа манна киирэр, — диир кини.

Анна Меркурьева бэлиэтииринэн, ахсынньы 15 күнүттэн бэлэхтэр уочараттаах уоппускаларыгар кэлэ сылдьар байыастарга туттарыллыбытынан барыахтаахтар. Аадырыстара: Дьокуускай, Аммосов уул. 18, 2/4 хос. Маныаха байыаннай сулууспалаахтар докумуоннарын уонна уоппускаларын туоһулуур докумуоннарын илдьэ кэлиэхтээхтэрин этэр.

Маны таһынан, мууһунан айан-сырыы аһылыннаҕына, сотору кэминэн тиэхиньикэлэри, аадырыстаах баһыылкалары уонна гуманитарнай көмөнү түһүмэхтэринэн ыыппытынан барыахтара.

—Коорлинационнай киин бэрэстэбиитэллэрэ бүгүҥҥүттэн, ахсынньы 4 күнүттэн, Нерюнгрига волонтердар пуорумнарыгар көхтөөхтүк кытта сылдьаллар. Кинилэр дьону кытары көрсөн кэпсэтэллэр. Суһал ыстаап бэрэстэбиитэллэрэ волонтердар пуорумнарыгар Ньурбаҕа, Мэҥэ Хаҥаласка, Дьокуускайга кыттыыны ылыахтара, — диир Анна Меркурьева. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.

Сиһилии: https://www.sakha.gov.ru/news/16536