Байыастарга саҥа көлөлөр тиэрдилиннилэр

Саха сирин тэрилтэлэрэ биэрбит массыыналара тирэх пууннарга тиэрдиллибиттэр. Салгыы тирэх пууннар үлэһиттэрэ көлөлөрү байыаннай чаастарга тиэрдиини хааччыйаллар.

Бу туһунан СӨ гражданскай көмүскэлин уонна нэһилиэнньэ олоҕор-дьаһаҕар куттал суох буолуутун хааччыйыы миниистирин солбуйааччы Яна Наумова иһитиннэрдэ.

«Маны таһынан, тирэх пууннарга гуманитарнай көмөлөр уонна аадырыстаах баһыылкалар тиэрдилиннилэр. Өссө тоҕус массыына айаннаан иһэр», — диир миниистири солбуйааччы.

Кини этэринэн, муус устар ортотугар диэри байыаннайдарга өссө 20-чэ көлөнү биэрии былааннанар.

«Саха сиригэр «Патриотическай» ТОР резиденнэрэ  Арассыыйа Сэбилэниилээх Күүстэригэр «ЯКТ-Сокол» квадроцикллары, «Тимир Ат» электроматасыыкыллары уонна «Хотой-10″ БПЛА хомуйары уонна тиэрдэри салгыыр», — диэн  этэр Яна Наумова.

Байыаннай дьайыы кыттыылаахтарын эбии наадалаах тэрилинэн, малынан-салынан эбии хааччыйыы  салҕанар.

СӨ Ил Дарханын уонна Бырабыыталыстыбатын пресс-сулууспата