Байыастарга туһалаах дьаарбаҥкалар

Саха сиригэр  байыаннай дьайыы 694  кыттыылааҕа уонна кинилэр дьиэ кэргэттэриттэн 282 киһи үлэ миэстэтинэн хааччылыннылар.

Бу туһунан бүгүн «Якутия 24» телеханаал «Актуальное интервью» биэриитигэр нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлин солбуйааччы Георгий Борисов иһитиннэрбитин СӨ Ил Дарханын уонна Бырабыыталыстыбатын пресс-сулууспата суруйар.

—Бу былааннаах көрдөрүү 75,9 % ылар. Саха сиригэр 2025 сылга байыаннай дьайыы кыттыылаахтарын уонна кинилэр дьиэ кэргэттэрин чилиэннэрин үлэлэтэргэ 914 үлэ миэстэтэ 509 тэрилтэҕэ көрүллүбүтэ, — диэн кини этэр.

Байыаннай дьайыы кыттыылаахтарын дьарыктаах буолууларын хааччыйарга үлэ көхтөөхтүк ыытылларын, судаарыстыба оҥорор өйөбүллэрин туһунан иһитиннэриилэр бойобуой дьайыылар бэтэрээннэригэр кэмигэр тиэрдиллэн иһэллэрин бэлиэтиир.

—Маны таһынан, судаарыстыба өйөбүллэрин дьаһалларыттан биирдэстэринэн байыаннай дьайыы кыттыылаахтарын эбии үөрэхтээһин хайысхата буолар. Гражданнар бэлэмнэнии араас хайысхаларынан үөрэнэ барыахтарын сөп. Холобур, быйыл байыаннай дьайыы 12 кыттыылааҕа урбааҥҥа, суоппар, электрогазосварщик, хочуолунай операторын идэлэригэр, уо.д.а. үөрэннилэр, — диэн этэр.

Биэриигэ кини дьарыктаах буолууга туһуламмыт анал дьаарбаҥкалар ыытыллалларын бэлиэтээтэ.

—Быйыл алта дьаарбаҥка ыытылынна, ол иһигэр «Работа России. Время возможностей» Бүтүн Арассыыйатааҕы дьаарбаҥка икки түһүмэҕинэн буолла. Бу тэрээһиннэри нэһилиэнньэ дьарыктаах буолуутун сулууспалара бэйэлэрэ итиэннэ «Аҕа дойдуну көмүскээччилэр» пуонда филиалын кытта бииргэ тэрийиинэн эмиэ ыыталлар. Ыам ыйын 28 күнүгэр байыаннай дьайыы кыттыылаахтарыгар анаан биир кэлим үлэнэн хааччыйыы күнэ ыытыллыбыта. Бу күн өрөспүүбүлүкэ бары дьарыктаах буолуутун кииннэригэр байыаннай дьайыы кыттыылаахтарыгар уонна кинилэр дьиэ кэргэттэригэр 35 дьаарбаҥка ыытыллыбыта. Дьарыктаах буолуу сулууспаларын тэрээһиннэригэр 177 бэтэрээн кыттыбыта. Маннык дьаарбаҥка аны сэтинньигэ былааннанар, — диэн иһитиннэрдэ Георгий Борисов.

СӨ Ил Дарханын уонна Бырабыыталыстыбатын пресс-сулууспата

Сиһилии: https://www.sakha.gov.ru/news/10745