Байыастарга уонна кинилэр дьиэ кэргэттэригэр аадырыстаах көмөнү оҥоруу үлэтэ салҕанар

Бүгүн, кулун тутар 10 күнүгэр, байыаннай дьайыы кыттыылаахтарыгар анаммыт өйөбүл туһунан брифинг буолла.

Брифинг «Саха» НКИХ уонна «Якутия 24» ханаалларынан көһүннэ уонна «Тэтим» араадьыйаҕа иһилиннэ. СӨ Бырабыыталыстыбатын салайааччыта Георгий Степанов бэлиэтээбитинэн, өрөспүүбүлүкэҕэ Анал байыаннай эпэрээссийэлэргэ кыттар байыаннай сулууспалаахтарга уонна кинилэр дьиэ кэргэттэригэр аадырыстаах көмөнү оҥоруу үлэтэ салҕанар. Күн бүгүн 177 ыал олорор дьиэни гаастааһыҥҥа, 597 байыаннай сулууспалаахтар төрөппүттэригэр санаторийга эмтэниилэригэр өйөбүл оҥоһулунна.  439 байыаннай сулууспалаах киһи эмтэнэр сиригэр айаныгар үп-харчы көмөтүн ылла.

1105 байыаннай дьайыы кыттааччыта уонна кинилэр дьиэ кэргэттэрин 1949 чилиэнэ доруобуйа харыстабылын уонна социальнай өҥө тэрилтэлэригэр реабилитацияны ааспыттар. 383 киһи социальнай өҥөнү дьиэҕэ уонна полустационарнай көрүҥүнэн туһаммыт. 726 киһи, ол иһигэр 249 байыаннай дьайыы кыттыылааҕа уонна 477 дьиэ кэргэн чилиэннэрэ дьарыктаах буолуу кииннэригэр үлэ булалларыгар көмө көрдөһөн сайабылыанньа биэрбиттэр. Итинтэн 155 киһи идэҕэ үөрэтиини ааста, 412 киһи үлэнэн хааччылынна.

Санатан эттэххэ, Ил Дархан Айсен Николаев Ил Түмэҥҥэ туһаайан этиитигэр байыаннай дьайыы  кыттыылаахтара социальнай адаптацияны ааһаллара биир сүрүн соругунан ааттаабыта.