Байыастарга үлэ дьаарбаҥката ыытыллыаҕа

Балаҕан ыйын 12 күнүгэр Дьокуускайга  байыаннай дьайыы кыттыылаахтарыгар уонна кинилэр дьиэ кэргэттэригэр үлэ дьаарбаҥката ыытыллыаҕа. Дьаарбаҥка Сайсары уокуругун быраабатын өйөбүлүнэн ыытыллыаҕа диэн Дьарыктаах буолуу киинин дириэктэрэ Николай Иванов иһитиннэрдэ.

Маннык дьаарбаҥкалар хаһыс да төгүлүн ыытылыннылар. Байыаннай сулууспалаахтар уонна кинилэр чугас дьонноро үлэ булалларыгар көмөлөөх.

Николай Иванов иһитиннэрбитинэн, сыл саҕаланыаҕыттан өрөспүүбүлүкэ Дьарыктаах буолуутун киинигэр 309 байыас уонна  кинилэр дьиэ кэргэттэрин чилиэннэрэ үлэ көрдөөн тиийбиттэр. Кинилэртэн 188 киһи үлэ булбут. 4 киһиэхэ бэйэ дьыалатынан дьарыктанарыгар үп-харчы бэриллибит. 38 киһини идэ ылалларыгар үөрэттэрэ ыыппыттар. 103 оҕо сайыҥҥы каникул кэмигэр  быстах кэмҥэ үлэлээбит.

Байыаннай дьайыы кыттыылаахтара уонна кинилэр дьиэ кэргэттэрин чилиэннэрэ Дьарыктаах буолуу киинин исписэлиистэриттэн сүбэ-ама ылыахтарын сөп: «Аҕа дойдуну көмүскээччилэр» пуонда дьиэтигэр тиийэн, эбэтэр, Контактнай киин 122 (эбии 7 нүөмэр) нүөмэригэр эрийэн, кэпсэтиэхтэрин сөп.

Көмөнү Дьарыктаах буолуу киинигэр учуокка туралларыттан-турбаттарыттан тутулуга суох, ылар кыахтаахтар.