Байыастары булгуччулаах геномнай регистрацияҕа киллэрэр туһунан сокуон барыла оҥоһулунна

РФ Бырабыыталыстыбата Судаарыстыбаннай Дуума көрүүтүгэр байыаннай сулууспалаахтар уонна Ис дьыала уорганнарын үлэһиттэрин сорох категорияларыгар булгуччулаах геномнай регистрацияны киллэрэр сокуон барылын оҥорон киллэрдэ. Докумуон Судаарыстыбаннай дуума электроннай базатыгар таҕыста.

Уларытыылары «РФ-ка судаарыстыбаннай геномнай регистрация туһунан» сокуоҥҥа киллэриллэрэ көрүллэр. Билиҥҥи нуормаларынан, геномнай регистрация буруйдарын боруостуур буруйдаахтарга, административнай хаайыыга олорор дьоҥҥо, уорбаланааччыларга, силиэстийэ хаамыытыгар биологическай матырыйааллара ылыллыбыт кимнэрэ биллибэт дьоҥҥо, ону тэҥэ сураҕа суох сүппүт дьон аймахтарыгар булгуччулаах буолар.

Көҕүлээһин ааптардара итинник регистрацияны РФ Сэбилэниилээх күүстэригэр уонна Росгвардияҕа хантараагынан сулууспалыыр байыаннайдарга, доброволец-байыастарга, полиция анал сыбаанньалаах росгвардеецтарга, Ис дьыала уорганнарын үлэһиттэригэр уонна РФ Сэбилэниилээх күүстэригэр, Росгвардияҕа сыһыаннаах гражданскай сулууспалаахтарга булгуччулаах оҥорору эмиэ этии киллэрэллэр.

Онуоха докумуоҥҥа бэлиэтэнэринэн, ааттаммыт дьону мобилизация кэмигэр, ыксаллаах эбэтэр байыаннай балаһыанньа усулуобуйатыгар, сэрии кэмигэр, ону тэҥэ норуоттар икки ардыларынааҕы терроризмы утары охсуһарга кыраныысса тас өттүгэр ыытыллар түгэннэригэр сулууспалыыр эбэтэр үлэлиир кэмнэригэр регистрациялыахтара. Оборуона министиэристибэтэ уонна Росгвардия үлэһиттэрэ геномнай регистрацияны ааспат байыаннай чаастар, тэрилтэлэр уонна уорганнар испииһэктэрин оҥорор кыахтаныахтара.