Байыастары кытта Суор Уола бүгүн дойдутугар эргилиннэ

Бүгүн “Боотур” Саха сирин этэрээтин байыастара дойдуларыгар эргилиннилэр. Кинилэр кэккэлэригэр суруйааччы Валерий Никифоров-Суор Уола баар. Сахасирэ.ру сайт суруналыыһа анал байыаннай эпэрээссийэ баҕа өттүнэн кыттыылааҕын кытта сибээстэһэ сырытта.

Маҥнай төлөпүөннээбиппэр автоответчик холбоно сылдьар этэ. Иһитиннэрии хаалларбытым, хата, сотору сибээскэ таҕыста.

— Төһө бэркэ көтөн кэллигит?

— Саха сириттэн барбыттар бүгүн 17 буолан Дьокуускайы буллубут. Москваҕа икки хоннубут. Этэҥҥэ көтөн кэллибит.

— Бу иккис сырыыҥ дии.

— Бу иккиспин баран кэллим, үс ый буоллум. Ол иннинэ икки ый сылдьыбыппыт.

— Иккиһин барбытыҥ кэннэ манна Суор Уолун дэйбиирин булбуттар, сүппүт үһү диэн сурах тарҕана сылдьыбыта. Ону бэйэҥ да иһиттэҕиҥ буолуо, хайдах ылыммыккыный?

— Истэн, кэпсээбиттэрэ. Олох кыһамматаҕым.

— Сахаларга, киһини эрдэ өлбүт диэтэхтэринэ, уһун үйэлэнэр диэн өйдөбүл эмиэ баар.

— Баҕар, оннук буолуо. Бастакы сырыыбар эмиэ өлбүт диэн сурах тарҕаммыт этэ. Этэҥҥэ эргиллэн кэллим.

— Өссө барар санаалааххын дуу?

— Ээ, сөп буолуо, хайа муҥун. Сааһым да ыраатта.

— Салгыы тугунан дьарыктанар былааннааххын?

—  Баҕа өттүнэн ыстаапка үлэлиибин. Уонна бу икки сырыы кэнниттэн дьэ, айар үлэбэр төннүөм этэ. Биһиги баҕа өттүнэн кыттааччылар буоллахпыт, онон “Суолбутун бэйэбит талабыт” диэн номнуо саҕалаан эрэбин.

— Билигин барар уолаттарга тугу этиэҥ, сүбэлиэҥ этэй?

— Эдэр оҕолору олох барымаҥ диэхпин баҕарабын. Биһиги курдук саастаах, отутун ааспыт, өйдөрүн туппут дьон бараллара быдан ордук. Наһаа эдэр оҕолор тиийэллэр. Миэстэтигэр араас буолар.

— Оборуона миниистирэ Сергей Шойгу аармыйаҕа ыҥырыллар сааһы 18-тан 21-гэр диэри уһатыахха диэн этэр дии. Эн итиннэ санааҥ хайдаҕый?

— Билигин биир эрэ сыл сулууспалыыллар. Ити кылгас бириэмэ иһигэр уолаттар туохха да үөрэммэттэр. Онон аармыйа сылын уһаталлара ордук дии саныыбын.

— Сөп, хоруйуҥ иһин махтал. Этэҥҥэ.