Байыастары реабилитациялааһыны биир кэлим үлэ эрэ кыайар

«Норуот уонна аармыйа — биир сомоҕо» Фашизмы утары өрөспүүбүлүкэтээҕи III пуорум чэрчитинэн, сэтинньи 5 күнүгэр «Арассыыйа — мин устуоруйам» түмэлгэ  социальнай үлэһиттэргэ, уйулҕа үөрэхтээхтэригэр, мэдиссиинэ үлэһиттэригэр сэминээр буолла.

«Социально-психологическое сопровождение участников СВО и членов их семей. Комплекс практических решений» сэминээри Палеев Антон Владимирович ыытта.

Байыаннай дьайыы кыттыылааҕа, офицер, байыаннай дьайыы кыттыылаахтара эйэлээх олоххо төннөллөрүгэр көмөлөһөр Антон Владимирович байыаннай дьайыыга барар уолаттар хантараак түһэрсэллэригэр кинилэри туох көҕүлүүрүн ыйытыыттан саҕалаата. Араас хоруйдар иһилиннилэр. Оттон байыаннай дьайыыга барбыт уолаттарга оҥоһуллубут аҥкыата түмүгүнэн дойдуну көмүскээһин бастакы миэстэҕэ турара биллибит.
Сэминээри ыытааччы байыаннай дьайыыттан кэлбит байыаһы уонна кини дьиэ кэргэнин кытары үлэни, социальнай-психологическай көмөнү биир киһи (идэлээх да киһи) кыайбатын, ол оннугар биир кэлим, хардарыта бииргэ үлэлээһин эрэ кыайарын тоһоҕолоон бэлиэтээтэ.
Антон Палеев салгыы сэминээри ыйытыы-харда, оонньуу көрүҥүнэн бэрт сэргэхтик ыытта.