Байыастары улуус баһылыктарын солбуйааччынан аныахтара

Ил Дархан Айсен Николаев Ил Түмэҥҥэ туһаайан этиитигэр 2025 сыл саҕаланыытыгар «Время героев» өрөспүүбүлүкэтээҕи бырагырааманы олоххо киллэрэллэригэр СӨ Ил Дарханын уонна бырабыыталыстыбатын дьаһалтатыгар уонна Ыччат министиэристибэтигэр соруйда.

«Время героев» РФ Бэрэсидьиэнин бырагырааматын кыттыылааҕынан байыаннай дьайыыга сылдьан Арассыыйа Дьоруойа буолбут Игорь Юргин буолар. Ахсынньы 14 күнүгэр «Биир Ньыгыл Арассыыйа» баартыйа сийиэһигэр РФ Бэрэсидьиэнэ Владимир Путин эрэгийиэннэргэ бу бырагырааманы киллэрэр туһунан эппитэ.

«Байыаннай дьайыыга кыттыбыт дьону оройуоннар уонна куорат уокуруктарын баһылыктарын патриоттуу иитиигэ солбуйааччыларынан аныырга көрдөһөбүн. Өрөспүүбүлүкэҕэ байыаннай дьайыы кыттыылаахтарын салайар үлэҕэ кыттыһыннарар бары кыах туһаныллыахтаах. Кинилэр дьулуурдара, быһаарыныылаах буолуулара, дойдуга тапталлара эйэлээх олоххо, Саха сирин сайдыытыгар наадалаах буолуохтаах,» — диэн Ил Дархан эттэ.