Байыастары уонна кинилэр дьоннорун кытары психологтар үлэлэрин соруктара быһаарылынна

СӨ Бырабыыталыстыбатын бэрэссэдээтэлин солбуйааччы Ольга Балабкинаны кытары көрсүһүүгэ байыастары уонна кинилэр дьиэ кэргэттэрин кытары психологтар үлэлэрин күүһүрдүү, тупсарыы туһунан Өрөспүүбүлүкэтээҕи психологическай киин салалтата уонна психологтара дьүүллэстилэр.

«Ил Дархан Айсен Николаев сорудаҕынан, бу сыл кулун тутар ыйыттан СӨ психологическай киинин психологтарын биригээдэтэ тэриллэн, Соҕуруу уонна Уһук Илин Федеральнай уокурук байыаннай госпиталларыгар  үлэ саҕаламмыта. Сарсыарда Доннааҕы Ростовтан психологтар онус мобильнай биригээдэлэрэ кэллэ. Бу киин Горнайдааҕы уонна Тааттатааҕы филиалын исписэлиистэрэ. Кинилэр байыаннай сулууспалаахтары кытары үлэлииргэ эбии үөрэммиттэрэ«, — диэн бэлиэтиир Ольга Балабкина.

Психологтар Ил Дархан саамай сөптөөх быһаарыыны ылбытын, байыастар психологическай көмөҕө олус наадыйалларын уонна исписэлиистэри кытары үөрүүнэн көрсөллөрүн бэлиэтээтилэр. «Биһиги дойдулаах эрэ байыастарбытын буолбакка, атын эрэгийиэн байыастарын кытары эмиэ кэпсэтэбит. Тоҕо диэтэххэ бу — биһиги үлэбит, онон кимиэхэ да аккаастаабаппыт. Сарсыардаттан киэһээ 23:00 чааска диэри өрөбүлэ суох үлэлиибит. Сылайабыт эрээри, дьиҥ көмөнү оҥорорбутуттан үөрэбит«, — дииллэр кинилэр.

Өрөспүүбүлүкэтээҕи психологичесмкай киин дириэктэрэ Владимир Скрябин биир биригээдэ ый устата үлэлиирин кэпсээтэ. «Ити кэм устатыгар, Доннааҕы Ростовка үлэлиир биригээдэ, ортотунан 800 байыаһы хабар. Ону таһынан госпиталларга кэлбит байыастар аймахтарын кытары көрсөллөр. Бу Саха сирэ ыытар ураты үлэтэ. Атын эрэгийиэннэртэн психологтар байыаннай госпиталларга суохтар. Ону сэргэ, бу психологтарга бэйэлэригэр эмиэ ураты уопут«, — диэн этэр кини.

Өрөспүүбүлүкэтээҕи психологическай киин дириэктэрин солбуйааччы Октябрина Туприна иһитиннэрбитинэн, кэлэр сылга уйулҕа өттүнэн чөлгө түһэрии үлэтин бэтэрээннэри эрэ кытары буолбакка, кинилэр дьиэ кэргэттэрин кытары эмиэ тиһиктээх оҥорорго, уһуннук үлэлэһэргэ соруктаналлар. «Байыастар төрөппүттэригэр, чугас дьонноругар өйөбүл эмиэ наадатын учуоттаан, дьарыктаныахпыт. Биһиги билигин да кинилэри кытары үлэлэһэбит, ол эрээри, кэлэр сылга ураты болҕомто ууруллуо«, — диэн бэлиэтиир.

Байыаннай дьайыы саҕаланыаҕыттан, психологтар 2023 сылга 22 тыһыынча тус уонна бөлөҕүнэн өҥөнү оҥорбуттар, 17 тыһ. байыас уонна кинилэр дьонноро хабыллыбыттар.

СӨ Ил Дарханын уонна Бырабыыталыстыбатын пресс-сулууспата