«Бакалдын» быйыл 35 сыллаах үбүлүөйүн бэлиэтиир

Сарсын, бэс ыйын 7 күнүгэр, кэрэ айылҕалаах Кэҥкэмэ үрэх биэрэгэр  эбэҥки норуота үгэс буолбут сайыҥҥы “Бакалдын” бырааһынньыга ыытыллар. Быйыл «Бакалдын» 35-с төгүлүн ыытыллар.

Улуустарынан солбуһан ыытар буолан, сылтан сыл аайы тэрээһин киэҥ далааһыннаахтык тэриллэр. Былырыын суолталаах тэрээһини Булуҥ улууһа ыыппыта.  Быйылгы эппиэттээх тэрээһин  Аҕа дойду Улуу сэриитигэр Кыайыы 80, Арассыыйаҕа Аҕа дойдуну көмүскээччи уонна Саха сиригэр Ийэ дойдуну көмүскээччи, Уус Маайа улууһугар Дьоруойдар сылларыгар ананар. 35 сыллаах үбүлүөйдээх “Бакалдыны” Уус Маайа оройуона тэрийэр. Хас биирдии улуус бэрэстэбиитэлэ национальнай таҥаһын кэтэн, сэлэлии хааман киирэн, тэрээһини киэргэтиэҕэ. Маны таһынан, Улуу Кыайыы үбүлүөйдээх 80 сылыгар  анаммыт улуустар «Победа за нами!» аахсыйалара буолуоҕа.

Саха эстрадатын сулустарын иитэн таһаарбыт  РСФСР  уонна Саха АССР  үтүөлээх артыыһа Юрий Платонов кэриэһигэр «Бакалдын көмүс куолаһа» өрөспүүбүлүкэтээҕи ырыа куонкуруһа буолуоҕа. Уус Маайа улууһун Күп нэһилиэгин аатырбыт  «Чээчэбил» үҥкүү кэлэктиибэ айар кэнсиэрин бэлэхтиэҕэ. Арассыыйа уонна Норуоттар икки ардыларынааҕы куонкурустар лауреаттара, виртуоз-баянист Владимир Боярскай «Баян эриэккэс дорҕооно» бырааһынньыктааҕы быраагыраамата үгүс көрөөччүнү абылыаҕа.

Тэрээһин бырагырааматыгар сиэри-туому ыытыы, улуустар этно-былаһааккаларын, астарын-үөллэрин киэргэтиилэрин, национальнай көстүүмнэри  көрүү, спортивнай күрэхтэһиилэр, араас куонкурустар буолуохтара. Уус Маайаттан тардыылаах “Тыгын Дархан» эрэстэрээн бренд-шеф пуобара Николай Атласов эбэҥкилэр национальнай астарын астаан амсатыаҕа.

Онон үбүлүйдээх тэрээһин бырагыраамата олус киэҥ, дириҥ ис хоһоонноох. Сарсыарда 8.30 чаастан Доҕордоһуу болуоссатыттан оптуобустар Кэҥкэмэҕэ тиийэ айанныахтара. Кэлиҥ, сылдьыҥ, ыалдьыттааҥ.