Балаҕан ыйын 1 күнүгэр хайдах күн-дьыл буолуоҕай?

Саха сирин синоптиктара балаҕан ыйын 1 күнүгэр былыттаах, сөҥүүтэ суох күнү-дьылы билгэлииллэр. Күн-дьыл хайдах буолуоҕун туһунан ЯСИА-ҕа Дьокуускайдааҕы УГМС начаалынньыгын солбуйааччы – Гидрометкиин начаалынньыга Татьяна Маршалик кэпсээтэ.

«Бу нэдиэлэҕэ турбут сылаас күн-дьыл сыл кэмигэр сөп түбэһэр нуорматыгар киириэҕэ, салгын температурата биллэрдик түһүөҕэ. Өрөбүлгэ уонна бэнидиэнньиккэ сөҥүүтэ суох буолуо», – диэн Татьяна Маршалик ЯСИА-ҕа билгэтинэн үллэһиннэ.

Кини этэринэн, сыл бу кэмигэр Саха сирин киин улуустарыгар салгын температурата нуорматыгар +18 кыраадыс буолуоҕа. Онон балаҕан ыйын 1 күнүгэр күн-дьыл туруга нуормаҕа сөп түбэһиэҕэ.

«Балаҕан ыйын 1 күнүгэр официальнай билгэлээһин билигин суох, ол эрээри былыттаах,  сөҥүүтэ суох күнү күүтэбит. Күнүс салгын температурата +18…+20 кыраадыс буолуо», – диэн Маршалик иһитиннэрдэ.