Балаҕан ыйын 1 күнүттэн орто хамнаһы ааҕыы уларыйыаҕа

Балаҕан ыйын 1 күнүттэн күүһүгэр киирэр уурааҕынан дойдуга орто хамнаһы быһаарар саҥа бэрээдэк үлэһиттэргэ хас да үчүгэй өрүттээх. Бу туһунан ТАСС-ка Судаарыстыбаннай Дума Үлэҕэ, социальнай бэлиитикэҕэ уонна бэтэрээннэр дьыалаларыгар кэмитиэтин бэрэссэдээтэлэ Ярослав Нилов кэпсээтэ.

«Уларыйыылартан биирдэстэрэ – орто хамнаһы ааҕыыга бириэмийэлэри эрэ буолбакка, үлэһиккэ бэриллэр харчынан көҕүлээһиннэри киллэрии буолар. Бу, биллэн турар, үлэһиккэ чахчы туһалаах», — диэтэ дьокутаат.

Кини этэринэн, выходной босуобуйа төлүүргэ орто хамнаһы ааҕарга туспа быраабыла киллэриллэр, ол эбэтэр орто күннээҕи хамнаһы ыйга орто үлэ күнүн ахсааныгар төгүллээн. Ону таһынан, докумуоҥҥа үлэ бириэмэтин түмэн учуоттуур түгэҥҥэ, уурайарга босуобуйа орто хамнаһа орто чаастааҕы хамнаһы сыллааҕы ый орто үлэ чааһын ахсааныгар төгүллээн ааҕыллара быһаарыллыбыт.

«Атын түгэннэргэ ааҕыы быраабылата уруккутунан хаалар. Холобур, халандаарынай күннэринэн бэриллэр уоппускалары төлүүргэ уонна туһаныллыбатах уоппуска иһин кэмпэнсээссийэни биэриигэ орто хамнас суоттанар кэм иһигэр мунньуллубут хамнас сууматын 12-гэ уонна ыйдааҕы орто халандаарынай күн ахсааныгар – 29,3-кэ үллэрэн ааҕыллар», — диэн Нилов иһитиннэрдэ.

Саҥа уураах биир үчүгэйинэн Нилов бу эйгэҕэ үлэлии сылдьыбыт бары эргэ нуормалыыр-бырааптыыр аахталар күүстэрин сүтэрэллэрин ааҕар.

«Барыта саҥардылынна, урукку барыта көтүрүллэр. Билигин барыта аныгылыы оҥоһулунна, саҥардылынна уонна саҥаттан үлэлиир буолла», — диэн парламентарий бэлиэтээтэ.

Орто хамнаһы ааҕыы бэрээдэгин уратыларын туһунан балаһыанньа урукку эрэдээксийэтэ 2007 сылтан үлэлиирэ. Бырабыыталыстыба бигэргэппит саҥа быраабылалара 2025 сыл балаҕан ыйын 1 күнүттэн күүстэригэр киириэхтэрэ уонна 2031 сыл балаҕан ыйын 1 күнүгэр диэри үлэлиэхтэрэ.