Балаҕан ыйын 1 күнүттэн учууталлар хамнастара үрдүөҕэ
![](https://sakha-sire.ru/wp-content/uploads/2022/10/dengi-yasia-900x596.jpeg)
Саха сирин Бырабыыталыстыбатын бэрэссэдээтэлэ Кирилл Бычков өрөспүүбүлүкэҕэ дьадайыыны утары охсуһар бырайыактыыр офис мунньаҕын ыытта.
Мунньахха дьадайыыны утары охсуһуу уопсай дьаһалларын бырайыактара көрүлүннүлэр. «Саха сиригэр үөрэх салаатыгар ылыныллар биир улахан суолталаах дьаһалынан учууталларга үлэ усулуобуйатын тупсарыы уонна хамнас таһымын үрдэтии буолар. Ол курдук, 13,8 %-тан 18,0 %- ҥа диэри үрдэтии көрүллүбүтэ: профессор-преподаватель састаабыгар уонна структурнай подразделениелар салайааччыларыгар, научнай, научнай- тэхиниичэскэй үлэһиттэргэ, структурнай подразделениелар салайааччыларыгар»,-диэн бэлиэтээтэ Саха сирин Бырабыыталыстыбатын Бэрэссэдээтэлин солбуйааччы Анатолий Семенов.
![](https://sakha-sire.ru/wp-content/uploads/2024/06/565.jpeg)
Ону таһынан кини эдэр учууталларга эбилик төлөбүр 75 %-ҥа диэри улаатыннарарга аадырыстаах көмө оҥоһулларын бэлиэтээтэ. Бу дьаһал 3 сылга диэри педагогическай ыстаастаах 4 800-тэн тахса эдэр исписэлиистэри таарыйыаҕа. Маны таһынан, тохсунньу 1 күнүттэн үлэ төлөбүрүн пуондатыттан үөрэх тэрилтэлэринэн хамнастара 5,5 бырыһыан улаатыннарыллыбыта.
«Үөрэх тиһигин сүрүн соругунан оскуолаларга көдьүүстээх профориентационнай үлэни тэрийии буолар. Үрдүкү кылаас үөрэнээччилэригэр «Мин бастакы идэм» бырайыак оҥоһуллубута. Бырайыак чэрчитинэн сыл аайы 10 тыһыынчаттан итэҕэһэ суох үрдүкү кылаас үөрэнээччилэрэ быраактыкалыыр хайысхалаах үөрэҕи ааһыахтара — бу хардыынан 2030 сылга үөрэнээччилэр 75 %-нара оскуолаҕа бастакы идэни баһылыахтара. Өрөспүүбүлүкэ атын интэриэһинэй бырайыагынан «Продвижение +» диэн үөрэх киинэ аһыллыыта буолар. Биһиги бу киин уопсай үөрэх хаачыстыбатын үрдэтиигэ көмөлөһүөҕэ диэн эрэнэбит», – диэтэ Анатолий Семенов.
Сообщить об опечатке
Текст, который будет отправлен нашим редакторам: