Балаҕан ыйын 1 күнүттэн устудьуоннарга истипиэндьийэ төлөбүрэ үрдүөҕэ

Саха сиригэр үрдүк уонна орто анал үөрэх кыһаларын, ону тэҥэ тус сыаллаах хайысхаларынан үөрэнэр устудьуоннарыгар истипиэндьийэлэрэ индексацияланыа. Маннык быһаарыы СӨ Бырабыыталыстыбатын мунньаҕар ылылынна.

Быйыл балаҕан ыйын 1 күнүттэн истипиэндьийэ 5,4% үрдүөҕэ. Ити 19 тыһыынча кэриҥэ устудьуону таарыйар. Ону сэргэ Бырабыыталыстыба бэрэссэдээтэлэ Кирилл Бычков Урбааҥҥа, атыыга-эргиэҥҥэ уонна туризмҥа саҥа миниистирин билиһиннэрдэ.

«Георгий Петрович бырабыыталыстыба хамаандатыгар үлэлээбитэ ыраатта. Эрэгийиэн туһатыгар ыкса үлэлэспитэ. Кини уопута саҥа дуоһунаска эбээһинэстэрин көдьүүстээхтик толорорго көмөлөһүөҕэ», — диэтэ Кирилл Бычков. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.

Ону таһынан агробырамыысыланнай комплекс эйгэтигэр каадырынан хааччыйыы, ону тэҥэ үлэ дьарыктаах буолуутун мэктиэлэрин инбэлииттэргэ биэриигэ сыһыаннаах хас да суолталаах боппуруостар таарылыннылар.