Балаҕан ыйын 15 күнүттэн “Путь ВОИНа” турнир түмүк түһүмэҕэ ыытыллыаҕа

Балаҕан ыйын 15 күнүттэн Дьокуускайга “Путь ВОИНа” Бүтүн Арассыыйатааҕы байыаннай-тактическай турнир түмүк түһүмүҕэ ыытыллыаҕа. Турнир “ВОИН” байыаннай-успуорка  бэлэмнэнии уонна патриоттуу иити киинин эрэгийиэннээҕи отделениеларын ортолоругар буолар. Көҕүлээччи – РФ Бырабыыталыстыбатын бэрэссэдээтэлин солбуйааччы-Уһук Илиҥҥи федеральнай уокурукка Арассыыйа бэрэсидьиэнин боломуочуйалаах бэрэстэбиитэлэ Юрий Трутнев.

Күрэхтэһии икки түһүмэҕинэн барар. Сүүмэрдиир түһүмэх атырдьах ыйын 28-31 күннэригэр Волгоград уобалаһыгар буолуоҕа. Саха сиригэр балаҕан ыйын 15-21 күннэригэр ыытыллар түмүк түһүмэххэ кыттааччылар дойду күүстээх хамаандатын аатын ылар иһин киирсиэхтэрэ.

Саха сирин хамаандатын сүүмэрдээһин хайыы үйэ саҕаланна. Хамаанда састаабыгар 14-17 саастаах 10 сүрүн уонна 2 саппаас кыттааччы киириэҕэ. Эрэгийиэннээҕи сүүмэрдээһин от ыйын 8 күнүгэр “Энергетик” лааҕыр базатыгар саҕаланар.

«Турнир түмүк түһүмэҕин биһиги өрөспүүбүлүкэбитигэр ыытыы – улахан чиэс уонна эппиэтинэс. Биһиги ыччат бэлэмнэнии байыаннай-прикладной көрүҥнэринэн төһө интэриэһиргиирин көрөбүт уонна маннык бырайыактар дьиҥнээх гражданины уонна патриоту иитэн таһаарарга көмөлөөҕөр эрэнэбит. «Путь  ВОИНа» турнир 2025 сылга Саха сиригэр биллэриллибит Ийэ дойдуну көмүскээччи сылын соруктарын олоххо киллэрэргэ дьоһун суолталаах түһүмэҕинэн буолуоҕа”, — диэтиэ Айсен Николаев.

“ВОИН” киин 2022 сыллаахха РФ бэрэсидьиэнэ Владимир Путин сорудаҕынан тэриллибитэ.  Киин анала – бэйэлэрин дойдуларын таптыыр уонна сатаан көмүскүүр патриоттар саҥа көлүөнэлэрин иитэн таһаарыы.  Билигин Арассыыйа 21 эрэгийиэнигэр Киин салаалара үлэлииллэр, онно 77 тыһыынчаттан тахса курсант хайыы үйэ үөрэннэ. Өссө 8 тыһыынчаттан тахса преподаватель  начаалынай байыаннай бэлэмнэнии бырагыраамаларынан хос үөрэҕи ааста.

СӨ Ил Дарханын уонна бырабыыталыстыбатын пресс-сулууспата