Балаҕан ыйыттан быраас эбээһинэһин ким толорор?

Балаҕан ыйын 1 күнүттэн биэлсэрдэр уонна акушеркалар терапевы, оҕо бырааһын уонна гинекологы солбуйаллара көҥүллэнэр диэн Госдуума доруобуйа харыстабылын кэмитиэтин чилиэнэ Тамара Фролова иһитиннэрдэ.

Бу исписэлиистэр анал үрдүк үөрэҕэ да суох буоллаллар, анамнез хомуйаллара, ыарыһаҕы көрөллөрө, чинчийэллэрэ, эми-тому аныыллара көҥүллэнэр.

«Балаҕан ыйын 1 күнүттэн быраас сорох эбээһинэһин биэлсэргэ уонна акушеркаҕа аныыры бигэргэтэр Арассыыйа Доруобуйа харыстабылын министиэристибэтин дьаһала күүһүгэр киирэр. Баччааҥҥа диэри кинилэр боломуочуйалара хааччахтаах этэ, ол гынан баран саҥа бирикээс үрдүк үөрэхтээх исписэлиис суох эбэтэр тиийбэт буоллаҕына быраас үлэтин атыттарга сүктэрэри сокуоннай оҥорор», — диэтэ Фролова.

Орто таһымнаах мэдисиинэ үлэһиттэрин эбээһинэстэрин кэҥэтии уопуттаах быраастар тиийбэттэриттэн тахсар. РФ Доруобуйа харыстабылын министиэристибэтин иһитиннэриитинэн, Арассыыйаҕа 23 тыһыынчаттан тахса квалификациялаах исписэлиис уонна 63 тыһыынча сиэстэрэ уонна биэлсэр тиийбэт, диэн иһитиннэрэр РИА-Сонуннар.