Эдэр учууталлар хамнаска эбилик ылыахтара

Балаҕан ыйын 1 күнүттэн Саха сиригэр үс сылга диэри үлэ ыстаастаах эдэр учууталлар хамнас акылаатыгар 75 %-наах кээмэйдээх эбилик ылар буолуохтара.

Бу туһунан Ил Дархан Айсен Николаев Атырдьах ыйынааҕы үөрэх тиһигин үлэһиттэрин сүбэ мунньаҕар иһитиннэрдэ.

«2024 сылга диэри үөрэх сайдыытын туһунан Ыйаах чэрчитинэн педагогическай үлэһиттэри өйүүргэ уонна үлэлэрин көҕүлээһиҥҥэ элбэх дьаһаллар ылыллыбыттара. Итини таһынан бу сыл балаҕан ыйын 1 күнүттэн Саха сиригэр үс сылга диэри үлэ ыстаастаах эдэр учууталлар хамнастарын акылаатыгар 75%-наах кээмэйдээх эбилик ылар буолуохтара. Ону тэҥэ 35-гэр диэри саастаах учууталлар улуустарынан үлэлииргэ дуогабар түһэристэхтэринэ үс хамнас акылаата кээмэйдээх аадырыстаах көмөнү ылаллар. Бу кэмҥэ көмөнү 300 учуутал туһанна», — диэн бэлиэтээтэ Айсен Николаев.

Ону таһынан Ил Дархан СӨ Бырабыыталыстыбатыгар 2025 сылга диэри үөрэх эйгэтигэр квалификацияны үрдэтии мэхэньииһимнэрин саҥалыы оҥорорго сорудахтаата.