Балаҕан ыйыттан элбэх оҕолоох ыал устудьуон оҕотугар 50 тыһ.солк. төлөбүр анааһына чуолкайданна

Саха сиригэр бу сыл балаҕан ыйын 1 күнүттэн элбэх оҕолоох ыаллартан орто  үөрэх кыһатыгар киирбит устудьуоннарга 50 тыһ. солк. биир кэмнээх төлөбүр бэриллиэҕэ.

Ил Дархан Айсен Николаев быһаарарынан, төлөбүр элбэх оҕолоох дьиэ кэргэн дохуотуттан тутулуга суох ааҕыллар буолуоҕа.

«Өскөтүн оҕо 23 сааһын туола илигинэ, элбэх оҕолоох дьиэ кэргэн дохуотуттан тутулуга суох бу сыл балаҕан ыйын 1 күнүттэн Социальнай көмүскэл управлениетын нөҥүө сайабылыанньа биэрдэххитинэ биир кэмнээх төлөбүрү ылыаххытын сөп», – диэн Айсен Николаев быһаарда.

Саҥа өйөбүл Арассыыйааҕа Дьиэ кэргэн уонна Саха сиригэр Оҕо саас сылын чэрчитинэн оҥоһуллар.

Харчынан көмө Саха сиригэр ирдэнэр уонна кэскиллээх идэлэргэ үөрэнэ киирбит устудьуоннар үөрэх төлөбүрүн сорох чааһын төлүүллэригэр ананар. Биир кэмнээх төлөбүр устудьуоҥҥа үөрэх былаһын тухары биир эрэ төгүл бэриллэр.