Балык арыытын туһата

Сэбиэскэй кэмҥэ балыыһаларга ураты сыттаах балык арыытын иһэрдэллэрин умна илик дьоннор бааллар. Билигин итинник эми анаабаттар. Ол гынан баран, быраастар этэллэринэн, тулаҕар бары ытырдар, сөтөллөор кэмнэригэр балык арыыта туохтааҕар да туһалаах.

1. Балык арыытын киһи ыарыыны утары охсуһарын күүһүрдэр, тыынар уорган (бронха) ыарыыларын сэрэтэргэ эмиэ туттуллар.

2. Статистика көрдөрөрүнэн, күһүн санаа тууйуллуутуттан (депрессияттан) сылтаан бырааска кэлээччи 20% элбиир. Балык арыыта санаа тууйуллуутуттан босхолонорго көмөлөһөр. Бу сыттаах эми иһэр киһи куруук үчүгэй настырыанньалаах сылдьар эбит. Тоҕо диэтэххэ, балык арыыта организм «дьол гормонунан» ааттанар серотонины оҥорон таһаарарыгар көмөлөһөр.

3. Хааҥҥа холестерины аҕыйатар уонна сүрэх-тымыр ыарыыларыттан харыстыыр. Балык арыытыгар хааҥҥа холестерины аҕыйатар омега-3 элбэх.

4. Уҥуох кытаатарыгар, артроз, остеопороз ыарыылары мүлүрүтэргэ көмөлөһөр. Ону таһынан остеопороһу сэрэтэргэ наадалаах Д битэмиининэн баай.

5. Үгүс киһи күһүн аанньа утуйбат. Күн сырдыга аҕыйааһына уонна күһүҥҥү түбүктэр биһиги организммытыгар суола суох хаалбаттар. Үчүгэйдик утуйбат киһи үлэлиир кыаҕа мөлтүүр. Күҥҥэ 2 г балык арыыта үлэлиир кыаҕы күүһүрдэр.

6. А битэмииннээх балык арыыта хараҥаҕа көрөрү күүһүрдэр уонна кыра да уокка өҥү араарарга көмөлөһөр. Харах сылайарын эрдэттэн балык сыатын иһэн туораттахха, катаракта ыарыы буулуо суоҕун сөп.

Билигин балык арыытын аптекалартан атыылаһыахха сөп. Сорохтор сытын кыайан тулуйбаттар. Ол гынан баран, сыта туох да булкадаһыга суоҕун, дьиҥнээҕин туоһута.