Балыксыт Ольга уолаттарга кэһиитин ыытта

Үөһээ Бүлүү улууһун Ороһу нэһилиэгин олорор Балыксыт Ольганы-Ольга Захарованы байыаннай дьайыыга сылдьар уолаттар үгүстэрэ билэллэр. Балыксыт Ольга байыаннай дьайыыга сылдьар уолаттарга бэйэтэ балыктаан уонна балыксыттартан хомуйан, ыраастаан, астаан, буһаран ыытар.

Бу күннэргэ Ольга эмиэ балыктаан саарыламмыт, ыыһаммыт, хатарыллыбыт, тууһаммыт балыктары, ону тэҥэ дыраһааҥка, аджика, харта буһаран, бэйэтэ Дьокуускайга тиэйэн аҕалан байыастарга ыытта. Уолаттар балык миинин иһэллэригэр диэн собону ыраастаан, тоҥорон ыыппыт. Бу баһыылкалар Хабаровскай госпиталыгар уонна Владивостокка байыаннай чааһыгар тиийиэхтэрэ.

Уолаттар Ольга Захарова балыгын үссэннэн күүс-уох эбинэбит, хатарыллыбыт собото наһаа минньигэс диэн махтанан хаста даҕаны суруйдулар. Ольга Петровнаҕа Саҥа дьылы көрсө 394 штурмовой полка байыастара махтал сурук ыыппыттара, баҕа санааларын тиэрдибиттэрэ.