Балыктаахха эдэр учууталлар уонна настаабынньыктар өрөспүүбүлүкэтээҕи сэминээрдэрэ буолла

Бу күннэргэ Мэҥэ Хаҥалас улууһун Балыктаах орто оскуолатыгар «Настаабынньык эдэр педагогтардыын айымньылаах үлэтин тиһигэ» диэн сонун тэрээһин буолан ааста.

Холбоһуктаах өрөспүүбүлүкэтээҕи сэминээри С.Н. Донской-II аатынан үөрэх сайдыытын уонна учууталлар идэлэрин үрдэтэр институт, Балыктаах орто оскуолатын нуучча тылын уонна литературатын учуутала, Ил Дархан «Бастыҥ настаабынньык»  бириэмийэтин хаһаайката Ангелина Говорова көҕүлээн ыыттылар. Тэрээһиҥҥэ араас улуустартан 70 педагог кыттыыны ылла.

Сэминээр туһунан Балыктаах орто оскуолатын настаабынньык-учуутала Ангелина Говорова бу курдук билиһиннэрдэ:

— Эдэр педагогтары уонна кинилэр настаабынньыктарын түмэр тэрээһин сыала-соруга: бииргэ үлэлээһин хайысхатын тобулуу, үлэ сонун сүүрээннэрин торумнааһын. Томпо, Уус Алдан, Чурапчы, Нам улуустарыттан уонна Дьокуускай куораттан кэлбит ыалдьыттарбытын Балыктаах оскуолатын  эдэр педагогтара истиҥник көрсөн, алгыс тылларынан айхаллаан, сэминээрбитин саҕалаатыбыт. Тэрээһин аныгылыы «вертушка» ньыматынан барда. Ол эбэтэр, эдэр учууталлар хамаандаларга арахсан алта хайысханан: «Бэйэ-бэйэни хаҥатыһыы»,  «Олохтоох оскуола виртуальнай түмэлэ», “Цифровой технологияны туһаныы”, «Педагог идэтинэн үүнүүтэ-сайдыыта», «Архитектура эйгэтигэр оҕону уһуйуу», «Үөрэтии аныгы ньымата» курдук  үөрэхтэри аастылар, элбэҕи биллилэр-көрдүлэр.

Настаабынньыктарга туһунан үөрэх буолла. Ол курдук,  эдэр педагогтар оскуолаларын үлэлэтии үөрүйэҕин, эдэр педагогтар нэһилиэк олоҕор кыттыыларын, кылаас салайааччытын умсулҕаннаах үлэтин, аныгылыы үөрэх сонун бырайыактарын хайдах оҥоруохха сөбүн туһунан иһитиннэрииллэр сэминээр кыттыылаахтарын болҕомтотун тартылар.

         Салгыы эдэр педагогтар 5 хайысхаҕа арахсан, бэйэлэрин бырайыактарын көмүскээтилэр. Истиҥ эйгэҕэ эдэр дьоммут бэрт кэскиллээх бырайыактары оҥорон таһааран кэрэхсэттилэр. Оттон настаабынньыктар атах тэпсэн олорон, үлэ уопутун  атастастылар.