Балыктаахха икки түөлбэҕэ киинтэн ититии холбонно!

Мэҥэ Хаҥалас улууһугар Балыктаахха ититиигэ холбуур үс сыллаах тиһиктээх үлэ түмүгэ көһүннэ.

Сайдыс уонна Аартык түөлбэлэргэ ититиини биэрэннэр, түөлбэлэр олохтоохторун үөрүүлэрэ үксээтэ. Быйыл сайын устата Балыктаахха ОДьКХ үлэһиттэрэ (сал.Ноговицын И.Н) тохтообокко сыраласпыттарын түмүгэр, магистральнай турбалартан саҕалаан ититиини ыытан, хас биирдии дьиэни көрөн-истэн холбоотулар. Бу ыытыллыбыт үлэлэргэ сүрүннээн олохтоох ОДьКХ үлэһиттэрэ уонна АДС икки биригээдэтэ кэлэн көмөлөстүлэр.

Тыа ыалын биир сыралаах үлэтэ оһох оттуута көҕүрээтэ. «Аны сынньанабыт, сарсыарда сылаас дьиэҕэ уһуктар үчүгэйин», — диэн бүгүн сарсыардаттан  ититиигэ холбоммут бар дьоммут үөрүүлэрин үллэһиннилэр.

Бу курдук кэтэспит күммүт-дьылбыт үүнэн,  элбэх үлэттэн, кыһамньыттан тахсыбыт улахан үлэ түмүгэ көстүбүтүттэн нэһилиэк олохтоохторо баһылыкпытыгар Куприянов Александр Валерьевичка, ОДьКХ салайааччытыгар Ноговицын Иван Николаевичка, сварщик Андрей Гоголевка махтанабыт. ОДьКХ үлэһиттэрин сыраларынан, түбүктэринэн кыстыкка бэлэмнэнии үлэтэ ситэриллэн барыта этэҥҥэ буоларыгар диэн баҕа санааларын дьон-сэргэ тиэртэ.

Инникитин улуус дьаһалтатын, улуус ОДьКХ кытта толкуйдаан, үлэлэһэн хаалбыт икки Лесной уонна Нагорнай түөлбэлэрбитигэр эмиэ ититии холбоноругар эрэллэрин эттилэр.

Мария Захарова,

Балыктаах.

Хаартыскалар ааптар тиксэриилэрэ