Балыктааһын квотатын элбэтии боппуруоһун көрүөхтэрэ

СӨ Бырабыыталыстыбатын Бэрэссэдээтэлин солбуйааччы Михаил Никифоров Булуҥ улууһугар балыктыыр учаастактарга сырытта. Билигин балык хаһаайыстыбаларыгар күһүҥҥү балыктааһыҥҥа бэлэмнэнии үгэнэ.

Бу туһунан Ил Дархан пресс-сулууспата иһитиннэрэр.

Бырабыыталыстыбатын Бэрэссэдээтэлин солбуйааччы Михаил Никифоров Кумах Сурт учаастагар «Булуҥ» МУП-ка, Тиит Арыы учаастагар «Тиит-Арыы» ХЭУо, «Арктика» Сокол артыалыгар сырытта, үлэһиттэри кытары хаһаайыстыбалар инники сайдыыларын туһунан дьүүллэстэ.

Булуҥ улууһун балыксыттара балыктааһыҥҥа квотаны улаатыннарыыны туруорустулар. Квотаны наука үлэһиттэрэ балыгы кэтээн көрүүлэригэр олоҕуран, көрүҥнэринэн ахсааннарын чопчулааһыннарын түмүгүнэн быһаараллар. Ону тэҥэ, балык хаһаайыстыбалара бултаммыт балык хаачыстыбатын сүтэрбэтин туһуттан тоҥорор тэрили саҥардан биэрии наадатын тоһоҕолоон бэлиэтээтилэр.

Михаил Никифоров балыгы бултааһын квотата өрөспүүбүлүкэ салалтатыгар көрүллүөҕэ диэн эттэ. Онон Тыа хаһаайыстыбатын уонна Экология, айылҕаны туһаныы уонна ойуур хаһаайыстыбатын министиэристибэлэрин исписэлиистэрэ кыттыылаах мунньахха Булуҥ уонна да атын улуустарга балыгы бултааһын квотатын элбэтии боппуруоһун көрүөхтэрэ.