Балыктар хайдах өлбүттэрин быһаараллар

Бу дьыл балаҕан ыйын 20 күнүгэр Аммаҕа өлбүт балыктары булууну кытта сибээстээх иһитиннэриигэ Саха Өрөспүүбүлүкэтин Экологияҕа, айылҕаны туһаныыга уонна ойуур хаһаайыстыбатыгар министиэристибэтэ маннык чопчулуур.

Барыллааһын чахчынан, булуллубут өлбүт балыктар түүн муҥхалааһыны кытта сибээстээхтэр дии саныыбыт. Сабаҕалаан эттэххэ, балыксыттар балыктарын сорҕотун төттөрү өрүскэ ыыппыт буолуохтарын сөп.

Бүгүн, балаҕан ыйын 20 күнүгэр, балык харыстабылын иниспиэктэрдэрэ бэрэбиэркэҕэ бардылар.

Оттон Амматааҕы экологияны кэтээн көрүүгэ иниспиэксийэ лабаратыарыйаҕа анаалыска анаан уу боруобатын ылла.

Мээндиги бөһүөлэгиттэн саҕалаан Чурапчы улууһун Мындаҕаайытыгар диэри өрүс кытылын нэһилиэктэр баһылыктара кэтээн көрдүлэр.

Бу дьыалаҕа сыһыаннаах буруйдаахтары булууга полиция үлэһиттэрэ эмиэ кыттыстылар.