Арыгыттан күүскэ сүһүрбүт 13 саастаах кыыс балыыһаҕа киирдэ

Ааспыт түүн  балыыһаҕа арыгылаах утахтартан күүскэ сүһүрбүт 13 саастаах кыыс киллэрилиннэ.

ИДьМ сулууспатын 1№-дээх полиция отделын Саастарын ситэ илик оҕолор дьыалаларыгар салаата бэрэбиэркэни ыытар.

Барыллаан быһаарыллыбытынан, сокуоннай саастарын ситэ илик оҕолор бөлөхтөрө Чочур Мыраан күөлүн көҥүлэ суох сиригэр сөтүөлээбиттэр. Ити кэмҥэ кинилэртэн сорохторо арыгылаах утаҕы испиттэр, түмүгэр биир кыыстара арыгыттан сүһүрбүт.

Төрөппүт хонтуруола суоҕуттан сибээстээх бу быһылаан алдьархайга тиэрдиэн сөп этэ. Дьолго эдьиийэ көрдүү тахсыбыт буолан, күөлгэ чугаһаан иһэн кыыс ууга түһэн эрэрин көрөн, айдааны тардыбыт. Эмсэҕэлээбит кыыһы өйө суох туруктаах кытылга таһаарбыттар. Эдьиийэ чугас олорор аймахтарыгар биллэрбит, онтон кинилэр суһал мэдиссиинэ көмөтүн ыҥырбыттар.

Полиция тахсыбыт быһылаан төрүөтүн уонна туох-хайдах буолбутун быһаарыаҕа, ол иһигэр оҕолор хойукка диэри көҥүлэ суох сиргэ сөтүөлээбиттэрин, көрүүтэ-харайыыта суох сылдьыбыттарын, ону таһынан сокуоннай саастарын ситэ илик оҕолорго арыгы хайдах атыыламмытын быһаарыаҕа.

Төрөппүттэргэ РФ Административнай быраабы кэһиилэр туһунан Кодексатын 5.35 ыстатыйатыгар сөп түбэһиннэрэн административнай дьаһаллар ылыллыахтара («Төрөппүттэр эбэтэр сокуоннай атын бэрэстэбиитэллэр сокуоннай саастарын ситэ илик оҕолору тутууга уонна иитиигэ эбээһинэстэрин толорбот буолуулара»), диэн Саха Өрөспүүбүлүкэтинээҕи ИДьМ пресс-сулууспата иһитиннэрэр.